Pynrem jur u MLA ka South Shillong halor ka jingjia shah pyniap ha EJH, hiar arsut ki kam shongshngain

Syllad | The Rising MeghalayaJuly 7, 2024

U MLA ka BJP na South Shillong u Bah Sanbor Shullai u la pynpaw ka jingsngewkhia bad pynrem jur halor ka jingjia shah pyniap ba shyrkhei jong ki sawngut ki briew ha ka shnong Umpleng, East Jaintia Hills kaba pyni ruh ba ka synshar khadar jong ka ain mynta ka la don hapdeng ka jingsyier kaba khraw.

U Bah Shullai u la kyntu ia ka sorkar ba kam dei ban ngat ha kano kano ka jingshah pynbor. La jied ia ka sorkar ban pynthikna ba ka ain bad ka suk ka sain kan synshar ha ka imlang sahlang bad ka dei ban long katkum ka jingkitkhlieh jong ka.

Une u nongialam ka BJP u pynkynmaw kyllum ia ki nongshong shnong baroh bad khamtam ia ki bor sorkar ba ym don mano mano kiba long halor ia ka ain, ym don kiba don hok ban shim ia ka ain ha la ki jong ki kti. Ym don kano kano ka daw ha ka pyrthei kaba lah ban pynksan halor ka jingpyniap ia uwei pat u para briew.

U MLA u la kyrpad ia baroh ki kynhun kiba don bynta ban kiar na ki kam thombor bad ban aiti ia kino kino ki kam bymman sha ki bor pulit, da kaba ailad ia ka jingsynshar jong ka hok.

“Ha ka pyrthei ha kaba ki rynsan social media ki synshar, ki khubor hamsaia bad ki jingpynbna bym shisha ki lah ban saphriang sted bha tang da katto katne sien khniot (clicks), kaba nangpynjur ia ka jingmih ka jingiakynad hapoh ka imlang ka sahlang, bad kum kine ki jingjia bad ki khubor bym shisha bad ba sniew kim long satia kiba sngewtynnad na ka bynta ka imlang ka sahlang,” u la ong.

Ha kajuh ka por u Bah Shullai u la pyrto ia ki sienjam ba la shim da ki kynhun Seng treimon sngewbha ban tehlakam ia ka jingma jong u drok lem bad kiwei pat ki jingeh ha ka imlang ka sahlang bad u ai ruh ka jingkyrshan kaba pura ia kano kano ka rukom bym don ka  jingleh donbor na ka bynta ban pynbeit ia ki jingeh ha ka imlang sahlang.

Ha ka synshar paidbah baroh ki don ia ka hok ban pynmih ia ka sur hynrei ym don mano mano ba don ia ka laisen ban pyniap ne thombor iano iano, u la bynrap shuh shuh.