Pynrem jur ka Shillong Press Club ia ka jingkren kynthoh u president ka VPP, dawa pan map mardor

Syllad | The Rising MeghalayaOctober 20, 2023

Ka Shillong Press Club kala pynrem jur ia jingkren khlem nongrim jong u President ka Voice of the People Party (VPP) uba dei ruh u  MLA ka Nongkrem u Bah Ardent M Basaiawmoit uba la kynthoh pynjah burom ia ki nongthoh bad ki lad pathai khubor ka jylla bad dawa ruh ba u dei ban panmap mardor.

“Ka long kaba sngewsih ba u Nongthaw Ain bala shemphang bha, un pynmih ia kum kane ka jingkynnoh ba khlem nongrim pyrshah  ia ki nongthoh khubor halor ka nongrim ba ki ai khubor thok bad kynnoh ruh ba ki nongthoh khubor ka jylla ki dei kiba shah thied ba kin thoh khubor” ong ka kyrwoh ka SPC bala soi da u President Bah David Laitphlang bad General Secretary Powell Sohkhlet.

“Ka long ruh kaba kyndit ban iohsngew ba ula kren sha ki paidbah ba ki lad pathai khubor hangne ki leit lum lum ia ki jingialang ka VPP tang ban ioh kdew bad wad daw bad jingduna kiba don ha ka party” kila bynrap.

Na ka liang ka SPC ka pynkynmaw ruh ia u Bah Ardent ba ka dei ka kamram jong ki nongthoh khubor ka long ban lum jingtip ba kynthup ia kaba bha ne kaba sniew, kaba shong kat kum ki jingshisha ym ki hamsaia ne khana lorni.

Kumta ruh na ka liang ka SPC ka kwah ia u Bah Ardent ban kren shai la ka VPP ka khmih lynti tang ia ki jingtip bad ki khubor kiba kyrshan bad pynkiew skong ia ka VPP lane la ka VPP ka kwah tang ia ki briew kiba hap ha ka thup jong kine ki jingkynnoh jong u (ba thied pisa) ba kin wan lum ia ki khubor ka VPP nangne shakhmat.

Nalor kata ka SPC ka kwah ruh ban pynkynmaw ia u Bah Ardent ba ka jingbha ka result jong ka VPP ha ka ilekshon bala dep ka wan ruh na ka synniang jong ki lad pathai khubor kiba la pynsaphriang ia ki khubor ha man ki rynsan pathai khubor.

“Hato kane ka pyni ba baroh kito ki nongthoh khubor ba lum khubor na ki jingialang ka VPP ha ka elekshon bala dep ki dei kiba la siew da ka pisa lane pynbiej ha kino kino ki dur haduh ban ioh haduh 4 tylli ki seat ia ka party ba dang thymmai hapoh ka rynsan sain pyrthei ka Jylla” ong ka SPC.

Kumta ruh namar kane ka jingkynnoh, ka SPC kala dawa ia u Bah Ardent ba un ai ia ka kyrteng jong ki nongthoh khubor kiba la iaid bakla ha ka jingtreikam da ka lynti ka bym dei na ba ka jingkynnoh kyllum lang ia baroh ka long pyrshah ia ka jinglong laitluid bad jingbym shah liang ha ka kam thoh khubor ia kaba ka SPC bad baroh ki lad pathai khubor ka Jylla kila pyrshang katba lah ban bud beit bud ryntih.

Shuh shuh na ka liang  ki nongialam ka SPC kila ong ba ka jingkynnoh kyllum lang ia baroh ym tang ba ka dei ka kam biej hynrei ka dei ruh ka jingpynjah burom pyrshah ia ki nongthoh khubor ka Jylla. Kumta ruh na ka liang ka SPC ka dawa ka jingpynshai bad ka jingpan map lem kumta na ka liang ka SPC kan shim da kiwei pat ki sienjam.