Pynrem jur ka MSCPCR ia kiba donkti ha ka jingkhlad ki 2 ngut ki khynnah skul ha Karnataka

Syllad | The Rising MeghalayaMarch 19, 2025

Ka Chairperson ka Meghalaya State Commission for Protection of Child Rights (MSCPCR) kaba dei ruh ka MP barim ka Tura ka Agatha K Sangma ha ka 19 tarik Lber ka la pynrem jur halor ka jingjia ba sngewsih ia ki 2 ngut ki khynnah skul na Meghalaya ha Karnataka kiba la duh ei ia la ka jong ka jingim katba 22 ngut kiwei pat ki la ngat ha ki jingshitom na ka jingbam ia ka bam kaba la sniew.

Lyngba u kyrwoh ka MSCPCR ka pynpaw ba ka la iatreilang ryngkat ryngkat bad ka Karnataka State Commission for Protection of Child Rights ban pynthikna ban pynshitom pyrshah ia kito ki briew kiba donkti bad ruh ban shimkhia bad iarap lem ban khmih ha kaba iadei bad ka koit ka khiah jong kitei kiwei pat ki khynnah kiba dei na Meghalaya kiba dang don mynta hapdeng ka jingshah sumar.

“Ngi sngewsih jur ban tip halor ka jingkhlad noh jong ki arngut ki khynnah skul ka jylla ha Karnataka, kata uwei uba dei na ka shnong Lyndem kaba hap hapoh Pynursla Sub Division bad uwei pat naka shnong Sohparu kaba ha Nongstoin, West Khasi Hills,” ong ka Agatha.

Nalor kata ka la ong ruh, “Ngi la pan ia ka kaiphod kaba bniah na ka Karnataka State Commission for Protection of Child Rights khnang ban lap ia ki jingshisha halor ki jingdkoh kiba lam shaduh une u pud ka jingpynkhein ia ki hok jong ki khynnah.”

Ha kajuh ka por ka Commission ka ai ruh ka jingkitbok kitrwiang na ka bynta ka jingioh koit noh jong kine ki khynnah skul kiba dang don hapdeng ka jingshah sumar.