Pynrem jur bad kyntait ka MGSPHSVA ia ka jingkynnoh khlem nongrim jong ka seng HNLC

Syllad | The Rising MeghalayaJuly 9, 2025

Ka seng jong ki nongshong die madan hapoh ka lama jong ka Meghalya & Greater Shillong Progressive Hawkers and Street Vendors Association (MGSPHSVA), ka pynrem jur bad kyntait war ia ka jingkynnoh kaba khlem nongrim jong ka HNLC pyrshah ia ka Kong Biolin Pyrtuh bad ka Angela Rangad, da kaba ong ba kine ar ngut ki khlem kyrshan ia ki hok jong ki trai ri, pynban ki khwan myntoi shimet bad lum spah sha lade ne ki pyniaid ia kata ka “parallel economy”.

Halor kine ki jingkynnoh bad jingpynthoh bria jong ka HNLC, ka seng ki nongdie madan ha u kyrwoh lyngba u Bah Shane Thabah General Secretary ki kyntien kiba shai bad khlem tieng khlem riej ka pynshai paidbah ba mynta la shi phew snem, ki nongdie Madan hapoh ka seng MGSPHSVA, ki la trei bad ȉakhun dohim dohȉap na ka bynta ki hok jong ki nongdie madan bad ka jingȉakhun ka long ban ȉoh ka jingȉada na ka Riti Synshar ka Ri India bad ba ka Sorkar ka dei ban pyntreikam janai bad kyndon pa kyndon ia ka Aiǹ, Street Vendors (Protection of Livelihoods and Regulation of Vending) Act, 2014,  na ka bynta ban ȉada ia ka hok kamai jakpoh jong ki nongdie madan.

Ka la ong ruh ba ki hok jong ki trai ri Hynǹiewtrep bad kiwei de ki trai ri bad ki rit paid, la dep ban pruid dak bad bsuh ha ka Riti Synshar jong ka Ri India. Na ka por sha ka por, ki iing dorbar Thaw Aiñ jong ka Ri India bad Jylla bapher ki la thaw ia ki aiñ kiba khlaiñ na ka bynta ban ïada ia ki hok, ban pynneh pynsah ia ki dei riti bad ia ka spah jong ki trai ri ha Ri India. Ym tang katta, ki don ruh ki Aiñ ne ki kyndon ba la thaw da ki sengbah ka Pyrthei kiba ȉada ia ki hok bad ka khyndew ka shyiap jong ki trai ri satlak ka pyrthei.

Ka MGSPHSVA, ka kynhun ki nongdie madan ha ka jingȉakhun jong ka ha kine ki shi phew snem ka la kam kynti bad pyndonkam ia kine ki Aiñ, ym tang na ka bynta ki nongdie madan, hynrei ka la ȉeng ruh ban kren bad iakhun na ka bynta ki trai ri ha kaba ȉadei bad ka jinglong trai halor ka khyndew ka shyiap, ka hok ban rep ban riang, ka hok ban kamai ja kpoh bad ka jingpynneh pynsah ia ki dei riti bad kolshor. Ban long ki nongïakhun bad ki nongïada jong ki trai ri, kam mut ban kyntait noh ia ki hok jong kiwei pat ki para nongshong shnong. Tang lada baroh ki ȉoh ki jingȉada katkum ka Riti Synshar bad ki Aiñ bad baroh ki ȉoh ia ki hok jong ki, ngin sa lah ban ȉohmad bad im ha ka Ri/Jylla kaba roi, kaba synshar hok bad kaba shngaiǹ.

Ka la ong ruh ba mynta la bun phew snem, ka Angela Rangad bad ka kynhunThma U Rangli Juki (TUR) ki la ïa-ïeng ryngkat bad ïakhun na ka bynta ki hok jong ki nongtrei-nongbylla kiba trei ha ki jaka treikam ba dei Sorkar bad bym dei Sorkar, bad ha kiwei de ki jaka, Ka jingȉakhun ka long ban pynȉoh ha ki nongtrei nongbylla ia ki hok tynrai jong ki bad kane ka jingȉakhun ka la long ruh ha ka dur jong ka jingthaw bad jingpynlong ia ki Seng jong ki Nongtrei-Nongbylla ha ki ophis bad jaka treikam kiba pher.

Nalor nangta, ka TUR ka la ïeng bad kren ruh na ka bynta ki hok jong ki kynthei bad kiwei ki hok longbriew manbriew ha ka Jylla Meghalaya. Ryngkat bad ka TUR ka Angela Rangad ka la ïashim bynta ruh ha ki jingïakhih ban pynneh pynsah bad ban ïada ia ki khlaw, ki wah bad ka khyndew ka shyiap na ka jingshah pynjot ha kylleng ka Ri Khasi- Jaiǹtia. Kane ka jingȉakhun ban pynneh pynsah ia ka mariang ka kynthup ruh ia ka jingȉakhun ban pyrshah ia ka jingtih Uranium, ka jingtih pathar bad jingtih be-aiǹ ia u dewȉong, ka jingpyrshah ban den ia ki wah bad ka jinglute ia ka spah mariang.

Ka kynhun TUR ka la ȉadon kti ban ȉakhun ryngkat bad ki paidbah nongshong shnong ha kaba thaw bad pynlong aiǹ ia ki Aiǹ Right to Information Act, Lokayukta Act, ka Social Audit Act bad kiwei de. Baroh ngi tip ba kine ki Aiñ ki la long ka jingkyrkhu ia ki nongshong shnong bad ki la long ki atiar kiba khlaiǹ ban ïakhun pyrshah ia ka bamsap bad ka jingsynshar bym hok ha ka Jylla bad ka Ri baroh kawei.

Ka Seng ka la ong ba ka jingpynbudnam, ka jingpynthoh bria bad jingkynnoh kaba khlem nongrim jong ki riewthok, ki riewshukor, ba ka don ka jinglum pisa ne jingshim pisa na ki nongdie madan ka la ju don naduh mynshuwa bad ka Seng ki Nongdie Madan (MGSPHSVA) ka la ju ujor FIR sha ki bor jong ka Aiǹ pyrshah ia kine. Kane ka jingkynnoh ka dei ka kam poh jong ki riewshim kabu bad ka buit sianti jongno re, kiba thmu ban pynkulmar, ban pynpait pynpra bad ban pynthoh bria ia ka Seng ki Nongdie Madan.

Kine ki riewshim kabu kim don mynsiem jingïatiplem bad ki nud wat ban kynjat ia ka pliang ja jong ki rangli ki juki. Kumta kane ka jingkynnoh jong ka HLNC ba ka Angela Rangad bad Biolin Pyrtuh ki lum pisa na ki nongdie madan ki bym dei ki Khasi, ka dei ka jingpyrshang jong ki riewkutlad bad ki riewkhawpud ban pynkulmar jingmut, kiba thmu ban ber bih bad pynpulom ia ka jingȉakhun kaba hok bad kaba shisha jong ki nongdie madan. Kumta ka seng ki Nongdie Madan, ka MGSPHSVA, ka dawa ba ka seng HNLC ka dei ban kyrshan da ki sakhi bad ki sabut kiba biang halor kane ka jingkynnoh bad ka dei ban sei madan ia ki jingshem jong kata ka kynhun jurip kaba ki khot ka “research cell”.

Nalor kata ka la ong ruh ba na ki kyntien jong u kyrwoh ba la pynmih da u/ka Sainkupar Nongtraw ka pynartatien shibun la une ne kane ka briew ka dei kaba shisha bad bunsien ki ju mih kum kine ki khubor ruma. Kumta ka seng ki Nongdie Madan ka MGSPHSVA ka kyrpad jur ia ka tnat pulit ban tohkit bniah ia ka khubor ba la pyllait da u/ka Sainkupar Nongtraw bad ban khangdam shi syndon ia kum kine ki khubor lamler.

Khatduh eh, ka Seng MGSPHSVA, ka pynpaw ba ka ïengskhem ha ka jingïakhun bad jingdawa jong ka ban pyntreikam hok kyndon pa kyndon bad ha ka dur kaba shai ia ka Aiñ Street Vendors (Protection of Livelihoods and Regulation of Vending) Act, 2014, bad ban pynȉoh bad ïada ia ki hok jong ki nongdie madan.