Pynrem bad dawa siew bai lutksan ka HYC iaka dukan shah ther lyer pynsat khmat ha sor Shillong

Syllad | The Rising MeghalayaSeptember 5, 2023

Ka Hynniewtrep Youths’ Council (HYC) kala pynrem jur ia ka jingleh jong uwei u pulit uba phong jain iong uba kah dur ialade, uba lah bret da u stun grenade ha kawei na ki dukan jong ka longkmie Khasi.

Katkum ka jing iohi lyngba ki video ba lah saphriang kaba pyni ba une u Pulit u la kawang ia u stun grenade (tear gas) hapoh kane ka dukan kaba don ha parking lot mar pyrshah jong ka SBI Main Brnach haka sngi Nyngkong.

Kane ka jingleh jong une u pulit I kumba u don jingthmu ban shim ia ka jingim jong kiba don hapoh jong kane ka dukan kiba kynthup ia ki trai dukan bad ia ki nongwan bam. Shu donbok ba ha kane ka dukan kim shym lah pyndonkam ia ki tyndong shet (LPG Cylinder) hynrei te ka lah jia kaei kaei kaba sngewsih wat ban poi sha ka jingiap ruh ia kiba don hapoh kane ka dukan, la ong Roy Kupar Synrem general secretary HYC haka ha u kyrwoh.

Na ka liang ka HYC ka dawa ba dei ban pynshitom ia une u Pulit bad ia ki ophisar ki bym shym la lah ban the lakam ia ki pulit lajong. Ha ka jingshisha haba pyndonkam ia ki tear gas dei ban da antad tang ban pynpra ia ki paidbah ym ban leit kawang sha ki dukan sha jong ki riew shimet. Ka Sorkar kadei ban pynlong da ka jingtohkit kaba laitluid la utei u pulit u bret ia utei u bom dalade hi lane la don ki ophisar kiba aibor ia u ba un leh ia katei ka kam beain.

Ka HYC kala dawa ruh ba ki bor pulit bad ki bor synshar district kidei ban pynshai naei ki ioh ia ka bor ba kin leit kawang ia kum kine ki tiar pynbthei hapoh ki dukan jong ki riew paidbah ki bym don bynta ei ei bad ka jingjia ia kulmar. Ka Sorkar kadei ban leit siew bai lutksan mardor ia ki trai dukan bad kumjuh ruh kadei ban ai bai dawai ia kiba mynsaw ha katei ka dukan.