Khynra iaki jaka thang rnga ha Eastern West Khasi Hills

Syllad | The Rising MeghalayaJune 21, 2023

Ka Environment Protection Act bad ka ain Biodiversity Act, ka ophis jong u Range Forest Officer, Mairang Range ha ryngkat ka jingsynranlang jong ki bor pulit ka Eastern West Khasi Hills District ha ka 16 tarik u Jylliew 2023 ki la leit ban jurip ia ki kam thang rnga beain ha ki katto katne ki bynta jong ka distrik bad ha kane ka jingleit jurip la lap ia ka jingthang rnga beain, ka jingkhaii bad kit rnga beain ha kiba bun ki jaka khamtam ha ki thain Sohjarang bad Pathar Lyndan na ka bynta ban pynpoi sha ki kharkana kiba don ha Ri Bhoi distrik.

Ha kane ka sngi la ioh ruh ban pynpra noh ia katto katne ki jaka thang bad ki jaka ha kaba la lumthup ia u rnga beain bad la ioh ruh ban kurup ia u rnga ba la thang beain.

Wat hapdeng kiba bun ki diengpyngkiang kiba ka ophis ka iakynduh n aka por sha ka por, ka ophis jong u Range Forest Officer, Mairang Range lyngba ki snem, ka la iaibteng ban pynlong ia ka jingjurip bad jingkhynra ia kiba kum kine ki jaitkam beain.

Kane ka ophis ka kyntu ruh ia ki nongialam shnong ka thain ba kin iatreilang ryngkat ryngkat bad ka tnat Forest ban pakhang ia kiba kum kine ki kam pynjot mariang bad u Range Forest Officer ka Mairang Range u la ong ruh ba ka ophis kan iai bteng ban pynlong ia ki prokram pynshai paidbah halor kiba bun ki ain iada mariang naka bynta ki paidbah jong ka dong ka thain.