Pynphai ka KSU ia ki 21 ngut ki nongtrei bylla bar jylla bym biang kot na Mawlai

Syllad | The Rising MeghalayaAugust 1, 2024

Ka Seng Khasi Students’ Union (KSU) Mawlai Circle haka 31 tarik Naitung ka la pynphai noh ia kumba  21 ngut ki nongtrei bar jylla ki bym don ia ki kot ki sla kiba biang sha ki jaka kiba ki wan na ki jaka pyntrei bapher bapher ha ka thain Mawlai.

Kane ka jingpynher krad ia kine ki bar jylla da ki dkhot jong ka KSU ka la wan long ruh hadien ba la shem ba kim don satia ia ki kot ki sla kiba biang, kata naduh ki work permit bad kiwei pat.

Lyngba u kyrwoh ka Seng ka pyntip ba ka la pynlong ka jingtalasi work permit ia ki nongtrei bar jylla ha ki jaka pyntrei kiba don ha ka thain Mawlai bad beh krad noh ia kine ki bar jylla ki bym biang kot biang sla. Nalor ka la ong ruh ba kan dang iai bteng ban pynlong ia kiba kum kine ki jingkhynra ha kylleng ki jaka.

Kane ka jingkhynra ia ki nongtrei bar jylla ka long ruh shibynta ban pynbor ia ka sorkar Jylla ba ka dei ban pyntreikam noh mardor ia ka Meghalaya Residents Safety and Security Act (MRSSA), 2016, bad ia ka Inner Line Permit (ILP) khnang ban lah ban tehlakam ia ka jingwan rung kyrthep jong ki briew kiba na bar shapoh kane ka Jylla bad ban aijingiada ia ki hok bad ia ka bha ka miat jong ki trai shnong riewlum ka Jylla.