Pynpaw jingsngewnguh u CM ia ka Sorkar Pdeng ba tuklar halor ki kynrum kynram ha NEHU

Syllad | The Rising MeghalayaJune 6, 2025

U Myntri Rangbah ka Jylla u Conrad K Sangma u la pynpaw ka jingsngwnguh ia ka Sorkar Pdeng halor ka jingtuklar biang por ha kaba iadei ki kynrum kynram ha ka skulbah North Eastern Hill University (NEHU) kaba la plie lynti ia ki bor pyniaid bathymmai ba kin pyniaid ia ki kam ki jam kumba ju long.

“Nga kwah ban ai khublei ia ka Sorkar Pdeng bad baroh ki Myntri halor ka jingtuklar biang por. Nga la shong katto kane ki jingialang ha ki kyrdan bapher bapher bad baroh ki kam kila iaid shakhmat,” ong u Conrad haba kren sha ki lad pathai khubor ha ka 4 tarik Jylliew.

“Ia ka jingialang jong ka Academic Council la dep ban pynlong bad ia kaba la ai jingmynjur, ia ka Executive Council la dep ban pynlong ha kaba la mynjur ban thung ia u Pro Vice Chancellor bathymmai bad ngi la iohi ia ka bor pyniaid bathymmai kaba la sdang ban wandur biang kumjuh,” u la bynrap.

U Conrad u la pynpaw ruh ia ka jingkmen halor ka jingshim khia bad kongsan ha kaba iadei bad ka bha ka miat jong ki samla pule. Watla katta u la pynpaw ia ka jingsngew bynniaw ba kane ka jingjia baroh ka la kylla long ki kam shimet ha ka jaka ban khmih ha kaba iadei bad ka jingbit jingbiang jong ki samla pule.

“Nga sngewkmen shibun ban iohi ba baroh mynta ki la buh hakhmat ia ka bha ka miat jong ki samla pule bad mynta ki la iaid shakhmat khlem da iapein hynrei sngewbha ban sngewthuh ba ia ki jingmyntoi jong ki samla pule ym ym lah satia ban iapein,” u la ong.

Nalor kata u Myntri Rangbah u la ban jur ba ka sorkar jylla ka iai don beit ha syndah ban iarap pyniaid ia ki kam bad ban wanrah ia ka jingiatreiang, hynrei ha kaba khatduh hi ka dei ka NEHU bad ka Sorkar Pdeng kiba hap ban iatreilang ryngkat na ka bynta ban pynbeit ia ki jingeh ka ban neh shyrta.

“Kino kino ki jingiarap kiba ki donkam na ka liang ka jong ngi, ngi don hangne, ngi la pyrshang kat kaba lah bad nga sngewkmen ban iohi ba ngi la sdang iohi ia ka jingiaid beit ki kam ki jam ha ka skulbah NEHU,” u la ong.

Ha kaba iadei bad ka jingdawa ban weng noh ia u VC ka NEHU, u Conrad u la ong, ” Ka dei ka Sorkar Pdeng bad ka NEHU ban shim ia ka rai. Ngi la pynpaw ia ka jingsngew ka jong ngi, ngi la pyni ia kaei kaba ngi pyrkhat ka ban long ka sienjam nangne shakhmat.”