Pynpaw jingbitar ki samla pule NEHU ba wan tuklar ka VPP hapdeng ka jingiakhih jong ki

Syllad | The Rising MeghalayaNovember 8, 2024

Ki samla pule ka Skulbah North Eastern Hill University (NEHU), kiba pynlong jingiakhih ha ka 7 tarik u Naiwieng ki la pynpaw ka jingbitar ia ka jingwan mushlia jong ka Seng sain pyrthei Voice of the People Party (VPP) da kaba kyntu ba kam dei satia ban wan tuklar hapdeng kane ka jingiakhih ka jong ki.

Ia kane ka khubor la pynpaw shai khyndiat por hadien ba ka kynhun ki nongmihkhmat na ka VPP hapoh ka jingialang jong u Finance Secretary u Bah Danny Langstieh ka la leit iakynduh ia u Vice Chancellor ka NEHU u Prof PS Shukla bad mih ryngkat lang bad u ban kren sha ki samla kiba pynlong jingiakhih.

Haba iohi ia kane, u President ka NEHUSU u Samla Sandy Sohtun u la ong, “Ngi dawa ia u VC ba un hiar shuki noh mardor.Ngim kwah iano iano ruh ba kin wan tuklar halor ki jingdawa ki jong ngi.Leit sha la ka jong ka lynti lem kumta ngin khangdam ia ka University bad phin ym ioh lad ban mih shabar jong ka campus.”

Hadien ba u VC bad ki nongmihkhmat ka VPP ki la leitphai biang sha ka ophis jong u, ki samla pule kiba pynlong ia ka jingiakhih mardor ki la khang ia ka ophis jong u VC na shabar.