Pynlong SHG Mela ka ophis u DC, Eastern West Khasi Hills

Syllad | The Rising MeghalayaMay 4, 2022

Kum shibynta jong ka jingrakhe ia ka North East Festival 2022 kaba long shibynta na ka jingrakhe ia ka Azadi Ka Amrit Mahotsav, ka ophis jong u Deputy Commissioner, Eastern West Khasi Hills District ha ryngkat ka jingiatreilang jong ka ophis u Block Development Officer ka Mairang Block bad ruh ka ophis u Block Development Officer ka Mawthadraishan Block mynta ka sngi ki la pynlong ia ka SHG Mela cum Financial Literacy Camp ha Madan Mot Tirot, Mairang Mission, Mairang.

Ha kane ka prokram, u Syiem ka Hima Nongkhlaw, u Pa’iem PM Syiemlieh u la long kum u kongsan ha ka jingdon ryngkat u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka District, u Bah MB Syiem, ki ophisar bad nongtrei jong ki tnat sorkar bapher bapher, ki nongialam shnong ka thain, ki dkhot jong ki Seng Treilang (SHG) bad kiwei kiwei.

Ha ka jingkren ka jong u kum u kongsan, u Syiem ka Hima Nongkhlaw, u Pa’iem PM Syiemlieh u la kren halor ki SHG bad ka bynta kaba khraw ba ki don ban kyntiew ia ka ioh ka kot ki paidbah nongshongshnong khamtam eh ki riewkynthei.

U la kyntu ruh ia kito ki bym pat pyniasoh ialade ha ki SHG ba kin leh kumta namar ki SHG ki iarap ban kyntiew ia ka mynsiem jong ka jingiatreilang shitylli bad ka jingiakyrshan markylliang iwei ia iwei na ka bynta ka roi ka kiew jong ka imlang sahlang baroh kawei.

Ha kane ka sngi la ioh ruh ban sam ia ki sanction ai ram kaba la kot kyllum lang 70 lak tyngka sha ki 26 tylli ki SHG ka thain da u kongsan bad ki kynrem ki lyndan kiba la iadon ha kane ka prokram.

Ha kawei pat ka prokram ia kaba la pynlong kum shibynta jong kane ka juh ka jingrakhe, la ioh ban pynlong ia ka jingiakob Quiz ha skul Mairang Presbyterian Higher Secondary School, Mairang ha kaba ka Langtor Higher Secondary School, Langtor ka la jop ia ka kyrdan ba nyngkong, ka Mairang Presbyterian Higher Secondary School, Mairang ka la ioh ia ka kyrdan ba ar, katba, ia ka kyrdan ba lai la ioh ban rah da ka Mairang Presbyterian Science College, Mairang. (SDPRO, Mairang)