Pynlong prokram ka JAS ha Laitnongkseh halor ka kam shongkha khynnah, POCSO bad Drok

Syllad | The Rising MeghalayaAugust 23, 2023

Ka Jan Arogya Samiti (JAS) jong ka HWC-Sub-Centre Laitnongkseh ha ka 22 tarik mynta u bnai ka la pynlong da ka jingpynshai paidbah halor ka phang kaba iadei bad ka jingshah ktah na ka jingarmet khynnah (Teenage pregnancy), ka aiñ POCSO Act, halor ka jingpang HIV bad Aids bad kumjuh ruh halor ka jingkyrni ha ki jingdih pynbuaid (drug abuse).

Ha kane ka prokram ba la pynlong ha Laitnongkseh la wan ban iashim bynta da ki skul bapher bapher jong ka thaiñ kiba kynthup ïa ka Wahnongkseh Upper Primary School, ka Laitnongkseh Upper Primary School bad ka Mawkahiar Secondary School, kata nalor ki SHG bad ki VO jong ki shnong kiba mar jan.

Ki nongkren ba kyrpang ha kane ka sngi ki kynthup ia u bah W. Kharpran uba dei u Block Programme Manager uba la kren halor ka jingtreikam jong ka JAS, ka VHC bad ka jingdon bynta kine ha ka imlang sahlang.

Nalor kata la ioh ruh ka jingkren na u bah A Shanpru Officer i/c ka Sohiong Police Output ha kaba ula pynshai halor ka aiñ kaba teh lakam ïa ki kam thombor ïa ka longrynïeng jong ki khunlung khynnah kaba tip kum ka POSCO Act. La pynshai ruh hapdeng ki khynnah samla, longkmie longkpa ba kim dei ban shongkha khynnah ne ban pynshlur ban shongkha khynnah namar kane ka long kaba beaiñ bad kaba lah ban ngat ha ki jingpynshitom ba pyrkhing jong ka aiñ. 

Ha ka juh ka por, u Bah A Shanpru ula kyntu ruh ba ym dei ban thombor ïa ka longrynïeng jong ki khynnah bad kiwei kiwei ki jingpynshai kiba ïadei bad ka tei ka aiñ.                    

Kiwei pat kiba la ai ia ki jingpynshai ki kynthup ia I kong P Nongkhlaw (PHN) iba dei i nongtrei jong ka Sohiong CHC i ba la pynshai halor ka jingeh jingmynsaw na ka jingshongkha khynnah bad jingarmet ha ka por ba dang rit ka rta.

Kumjuh ruh na ïoh ka jingkren pynshai na u Bah J Pohtam (MACS) bad i kong G Jyrwa  kiba la pynshai halor ka jingpang HIV bad Aids bad ka jingma na ka jingdih ia ki kynja jingdih pynbuaid bad u drok.

La pynshit pynshngaiñ ïa kane ka prokram da ka jingrwai na ki khynnah skul jong ka Wahnongkseh Upper Primary School bad ka jingshad Zumba na i kong L Majaw (MLHP) bad i paralok.

Ha kane ka sngi la don lang ruh ki dkhot jong ka Executive Dorbar jong ka Shnong Laitnongkseh kiba kynthup ïa u bah Dhotdingstar Nongbri (Secretary Shnong), Bah Purningstar Shabong (Assistant Secretary Shnong) bad kiwei kiwei. La pynïaid ïa kane ka prokram da u Bah Diber Shabong uba dei u Chairman ka JAS uba dei ha ka juh ka por u Rangbah Shnong jong ka shnong Laitnongkseh.