Pynlong ki shipai BSF Meghalaya da ka prokram thung dieng ha Umpling

Syllad | The Rising MeghalayaAugust 1, 2023

U heh ka tnat shipai Border Security Force (BSF) Meghalaya, u Pradip Kumar, IPS, IG BSF ha ka 31 tarik u Naitung 2023, u la plie paidbah ia ka rally pynshai paidbah shibynta ban pynshlur ha kaba iadei bad ka jingdonkam ban thung ia ki tynrai dieng hapoh ka jaka treikam jong ka ha Umpling, Shillong.

Ha kane ka sngi la thung haduh palat 500 tylli ki tynrai dieng bapher bapher da ki heh shipai jong kane ka tnat BSF hapoh kane ka jaka treikam jong ka ha kaba la wan iashim bynta lang da ki khynnah skul ka BSF Senior Secondary School kumjuh da ki shipai ba la shongthait jong kane ka tnat.

Ia kane ka prokram thung tynrai dieng la pynlong ruh shabar ka jaka shong jong ki shipai BSF na Shillong, kata sha ki jaka shong ki shipai BSF kiba don ha ki thain khappud hapdeng ka India bad ka Bangladesh.

Ha ka jingkren na ka liang u Pradip Kumar, IG BSF Meghalaya u la pynpaw halor ka jingdonkam ban burom bad ban iada ia ki khlaw ki btap kumjuh ia ki jingdon jingem hapoh jong ka na ka bynta ka lawei.

Ha kajuh ka por u la ai ruh ka jingiaroh ia ki khynnah skul jong kane ka tnat kumjuh ia ki shipai kiba la shongthait halor ka jingwan shakhmat bad ka jingnoh synniang ka jong ki na ka bynta ban pynneh pynsah ia ka mei mariang.