Pynlong ki samla pule NEHU da ka jingiaid rally ban pyrshah ia ka jingkem ia u president ka NEHUSU

Syllad | The Rising MeghalayaApril 29, 2025

Ki samla pule ka North Eastern Hill University (NEHU) haka sngi ba Ar ki la pynlong da ka jingiaid rally bad signature campaign ban pynpaw pyrshah halor ka jingshah kem u president ka NEHUSU u samla Sandy Sohtun bad halor ka jingphah bor pulit hapoh ka campus jong ka skulbah.

“Ngi ieng pyrshah ia ka jingwan rung beain ki bor pulit hapoh ki jaka pule khamtam haba pyndonkam ban pyndonkam ban tehlakam bad pyntieng pynsmiej ia ki kynhun kiba don bynta. Ka jingwanrah da ki bor pahara kiba kieng atiar hapoh ki skulbah halor ka nongrim ka bym shongnia ka buh jingma ia ka jingshngain bad ka jinglong ba laitluid ki jaka pule, bad ngi ieng skhem halor ka jingpyndonkam bakla ia ka bor da ki briew ka ain ha ka dur jong ka jingkem beain,” ong ki jingthoh ha ki placard ba la rah da ki samla pule ha kane ka jingiaid rally ba la khot pynlong da ka NEHUSU kaba la khot ruh ban sangeh mardor ban leit shong klas.

Haba kren sha ki samla pule, u General Secretary ka NEHUSU u Toniho Kharsati u la ong, “Ngim lah ban pdiang ia ka jingkem ia u Sandy Sohtun namar kim shym la iaid katkum ka lynti kaba dei. Ki pulit ki la wan kem ia u da kaba phong da ki jain iing. Ki la pulom ruh ban pynithuh ia lade kum ki pulit bad ba ki la wan ban kem ia u Sandy. Ha ka por ba ki la kem ia u, ki la kem ruh ia uwei pat u samla pule hynrei hadien ki la pyllait noh ia u ha Gate V halor ka nongrim ba ki la kum ithuh bakla ia u kum uwei na kiba donkti halor ka jingjia shah shoh jong u nonghikai.”

U la ong ruh, “Kane ka jingleh ka jong ki ka pynlong ruh ia ngi ban buh jingkylli ba la ki bor pulit ki dei na ka bynta ban pynneh ia ka shongsuk shongsain haba ki la shu kem thurmur ia ki samla pule bad shu bret noh ia ki ha shiteng lynti.”

U la ong ba ka NEHUSU ha ryngkat ka KSU-NEHU Unit ki pynrem jur ia kane ka jingleh jong ki pulit bad bynrap, “Ngi long pyrshah ia ka tnad pulit namar ki pulit ki la wan hangne ban pynneh ia ka shongsuk shongsain hynrei ka jingjia hangne ka long ba ki pulit ki la pulom ban wan ha ki uniform haba kem briew bad kaba pynmih shibun ki jingkylli.”

Haba pynpaw halor ka mukotduma u DK Basu, u samla Kharsati u la kdew ba ki kyndon ain ki la kren shai ba ki pulit ki dei ban phong ha ki unifrom haba ki leit ban kem briew bad ong, “Balei ki la pulom ban bud ia ki kyndon haba ki wan ban kem briew hapoh ka campus jong ka skulbah.”

Nalor kata u la ther tyngeh ia ka tnad pulit da kaba ong, “Tang ban iada ia uwei u nonghikai, phi wanrah palat 100 ngut ki pulit bad CRPF. Kane ka jingjia ka dei tang ka jingkynnoh kat haduh mynta, ki pulit ki dang pynlong ia ka jingtohkit halor ka jingjia baroh, kumta balei ban donkam ban shim kyrpang. Nalor kata kane ka jingpaha bor pahara la leh khlem ka jingmynjur da ki bor pyniaid jong ka skulbah, hynrei ki la shu wad ban kem ia ki samla pule bad iaid pahara ha ki hostel.”

Kumjuh haba kynthoh ia ka sorkar jylla, u Kharsati u la ong, “Haba ngi kyrpad ia ka jingtuklar lem jong ka sorkar jylla halor ki kynrum kynram kiba dang iaid hapoh ka skulbah NEHU, ka jubab ka long ba kane ka kam ka long shabar u pud u sam jong ka sorkar bad mynta kumta ka la hukum ban phah bor pahara khlem da ka jingioh jingbit na ki bor pyniaid jong ka skulbah. Ngi pynrem jur ia kane ka jingleh namar kam long kaba lah ban pdiang.”

“Ngi kloi ban ai ka jingiatreilang. Lada phi kwah ban tohkit, ngi kloi ban ai ka jingiatreilang ba pura hynrei ngim lah ban pdiang ia kaba kum kane ka jingleh ban shu wan rung hapoh kane ka skulbah ban kem ia ki samla pule. Ngin ieng ialeh pyrshah kum ka NEHUSU. Lada ki pulit ki dang don hapoh kane ka skulbah, ngin ym sangeh satia ia ka rai ban sangeh shong klas kum ka dak ban pynpaw pyrshah ia ka jingwan tuklar ka tnad pulit,” u la bynrap