Pynlong jingpynshai paidbah ban iada na ka jingpang rabies ha Nangbah

Syllad | The Rising MeghalayaSeptember 28, 2024

Shi bynta ka jingrakhe ia ka ‘World Rabies Week 2024,’ ha ka 27 tarik Nailur la pynlong ia ka prokram pynshai paidbah halor ka jingpang rabies hapoh Nangbah LP School, ha Nangbah, West Jaintia Hills halor ka phang ” Breaking Rabies Boundaries”.

Ia kane ka prokram la pynlong da ka Tnad ka Koit ka Khiah ka sorkar Jylla ha ryngkat ka jingiatreilang bad ka Tnad District Animal Husbandry & Veterinary Dept, Dorbar Shnong ha ka jingwan iashim bynta lang da u District Medical & Health Officer, District Surveillance Officer (DSO), Medical & Health Officer i/c Nangbah, A.H. & Veterinary Officer, Veterinary Dispensary, Nangbah lem bad kiwei pat ki ophisar, ki khynnah skul, Self Help Group, nongshong shnong ka Nangbah Iawmusiang lem bad kiwei pat kiba ia don bynta.

Haba aijingkren ha ka prokram u DMHO, West Jaintia Hills, u Dr. K Dhar u la ai ka jingiaroh ia ka jingiatreilang  hapdeng kine ki ar tylli ki Tnad bad kumjuh ruh ia ka jingiatreilang jong ki nongshong shnong bad ka Dorbar shnong. U ai ruh ka jingkitbok kitrwiang ba kum kane ka jingpyrshang ban iatreilang kan dang iai bteng ym tang na ka bynta ban rat dyngkhong ia ka jingpang rabies, hynrei ban iada bad iakhun pyrshah ruh ia kiwei pat ki jait jingpang.

Ka Dr. M. Syngkon, District Surveillance Officer ka la batai shaphang ka jingpang rabies Infection, ka jingsaphriang jong ka, ki dak ki shin (Sign & Symptoms). Ka la ban jur ruh ia ka jingdonkam ban ioh ia ka dawai Anti Rabies lada jia ba shah ktah ksew ne kino kino ki jait mrad. Ka la kdew ruh ba ka jingai injek ka lah ban iada ia ka jingim lada ai kloi ban ai injek ia kiba ym donkam ban siew.

Katba na ka liang ka Dr. E Chen, ophisar na ka Tnad  AH & Veterinary ka la kdew ba ka jingai tika ha ki mrad ruh ka long kaba donkam ban iakhun pyrshah ia ka jingpang rabies. Kala batai ruh shaphang ki dak bad ki jingpang rabies ha ki mrad khamtam ha ki ksew. Kala  kyntu ruh ia  ki nongshong shnong ban wanrah ia ki jingri ba ki ri ha ka 28 tarik Nailur 2024 sha Veterinary Dispensary na ka bynta ban ai dawai khlem jingsiew ia ki mrad kum shi bynta jong kane ka prokram.

Na ka liang u Rangbah Shnong u la ai khublei ia ki Nongkitkam jong ka District kiba la lah ban pynlong ia kum kane ka jingialang bad u la kyntu ruh ia ki paidbah nongshong shnong ka Nangbah ba kin ai ka jingiatreilang bad ka tnad Health & Veterinary.