Pynlong jingialang ki heh BSF bad BGB ban kyntiew ia ka jingiadei ha ki kam khappud

Syllad | The Rising MeghalayaOctober 23, 2024

Ka Sector Commander level co-ordination meeting hapdeng ki shipai khappud Border Secutiry Force (BSF) bad Border Guard Bangladesh (BGB) kala long ha BOP Mahenderganj ha South West Garo Hills haka 22 tarik u Risaw.

Ia ka kynhun jong ki BSF la lamkhmat da u Sh Lalit Mohan Sharma, DIG, Sector HQ BSF Tura, katba u Sarkar Mohammd Mostafir, Deputy Director General, Sector Commander ka BGB, Mymensingh, Bangladesh u la ialam ia ka kynhun ka BGB.

Ha kane ka jingialang ki nongialam shipai na baroh arliang khappud ki la iamir jingmut halor kiba bun ki mat kiba iadei bad ki jaka khappud kynthup halor ka jingdonkam ban pynbha shuh shuh ia ka jingiatreilang halor kiba bun ki mat.

Ha kaba kut jong ka jingialang baroh ki arliang mamla ki la pynpaw ia ka jingsngew hun halor ka jingseisoh jong ka jingiakren kaba don jingmut bad kaba pynpaw ruh ia ka jingiadei kaba jan hapdeng kine ki artylli ki ri. Kumjuh baroh arliang ki la mynjur ban pyntreikam mardor ia ki rai ba la shim lyngba kane ka jingialang.