Pynlong ‘Enrolment Drive’ ka ophis treikam jong ka BMC, SSA Laskein

Syllad | The Rising MeghalayaSeptember 29, 2023

Ka Ophis treikam jong ka Block Mission Coordinator, SSA-SEMAM, Laskein West Jaintia Hills kum shibynta ban rakhe ia ka sngi kyrpang jong ka thoh ka pule halor ka mat pdeng mynta u snem ‘Promoting Literacy for a world in transition: Building the foundation for sustainable and peaceful societies’ , kala pynlong da ka Enrolment Drive Programme ha ka 27 tarik Nailur ha shnong Thadmuthlongpyrdi, Phramer CRC Laskein Block.

Ha ka jingialang ba la pyniaid da u Ma Silas Siangshai, CRP Laskein Block laioh ka jingkren maitphang ha ka jingiadei bad ka pule puthi na ka Dawansuk Lynthong, BMC, SSA-SEMAM, Laskein Block bad ka khot ka wer ruh ia ki nongshongshnong ka thain Laskein ba kin iatreilang ha ka ban kyntiew ia ka pule puthi jong ka dong ka thain bad kyrpad ruh ia ki longkmie longkpa ba kin shim ka jingkitkhlieh ban ym ailad ba ki khun ki kti jongki kin pep skul ne long kita ki khynnah ki bym ioh ia ka hok ban leit skul.

Kum ka jingsngewnguh sngewburom ia baroh ki Volunteers jong ki Special Training Centre badon ha Laskein Block, ka Ophis treikam jong ka Block Mission Coordinator, SSA Laskein ryngkat ka jingiatreilang bad ka ophis treikam jong ka DMC-SSA SEMAM, West Jaintia Hills,  nalor ka jingpynrung skul ia ki khynnah, ki la shim ruh ban pynkyrpang ia kane ka ka jingrakhe mynta u snem da kaba pynkup burom ia ki Education Volunteers kaba long ka dak ban pyni sha ka pyrthei  ba dei ma ki kita ki briew kiba trei jar jar ban kyntiew ia ka ka pule puthi  hapoh ka District khamtam ban ai jinghikai bad saindur saindar ia ka pyrkhat pyrdain kito ki khynnah ba don hapdeng ka jingkutlad bad duh jingkyrmen ha kaban ioh ia ka jingnang jingstad.

Ka Dr. Marki Biam, JRDO Laskein Block haba ai jingkren kum ka kongsan, ka la ong khlem ka jingnang jingstad ban im ha kane ka juk mynta ka long lehnohei, kumta ka khot ka wer  ia ki khynnah ba kim dei ban pep skul shiteng por, trei minot ban poi sha ka thong haduh ban da ioh  ia  ka jingnang jingstad.

Haba kut jong kane Enrolment Drive shwa ban ioh ki kyntien khublei na ka Oriency Langstang, BRP Laskein Block laioh ruh ka jingsam ia ki khusnam ha kaba ki nongjop jong ka Drawing-Painting ki long ka Evamgelin Suchiang, Muthlong Pioneer LPS, ka Emi Tang, Phylliewlang LPS bad u Stevenson Kanai, Muthlongrim Govt. LPS katba ha ka Slogan Competition pat ki nongjop ki long ka St. Vincent De Paul LPS,  Muthlongrim Govt. LPS bad ka Muthlong Pioneer LPS.