Pynliem ka Shillong Lajong ia ka Langsning haduh 6-0 ha ka Shillong Premier League

Syllad | The Rising MeghalayaMarch 1, 2025

Ka Shillong Lajong FC ka la leh ia kaei kaba dei ban leh khnang ban banbor ia ka lahduh, ka Mawlai SC da kaba pynliem ia ka Langsning SC haduh 6-0 ha ka lympung ialehkai OC Blue Shillong Premier League 2024 kaba la long ha ka 28 tarik Rymphang ha madan SSA Stadium, First Ground, Polo.

Kiba la ia don bynta ha kaba thep ia kine ki kol na ka bynta ka Shillong Lajong ki kynthup ia u Deibormame Tongper ha ka mini kaba 9’, Samchaphrang Lato 26′, Yohaan Benjamin 30′, Remark Kharmalki 76′, Babysunday Marngar 80′ bad u Mebannangkiew Thabah ha ka minit kaba 90’+2.

Mynta ka Lajong ka la lah ban kamai 39-point bad ioh bat ia ka kyrdan kaba ar haba ia nujor bad ka Malai kaba la kamai 41 point, hynrei ka Mawlai ka don sa kawei ka jingialehkai kaba kan dang iakhun.

Na ka bynta ka Langsning kane ka dei ka jingialehkai kaba khatduh jong ka samoi ialehkai bad iai neh ha ka kyrdan kaba saw da kaba ioh 24 point, hynrei kane katei ka lahduh barim ka dang iai bat ia katei ka kyrdan hadien ba kine ki artylli ki club kiba hapoh jong ki (kata ka Laitkor 23-point bad ka Nangkiew Irat 22) baroh artylli ki dang don sa mar artylli ki jingialehkai ban pyndep.

Ha katei ka jingialehkai ka Lajong ka la lah ban banbor naduh kaba sdang bad tang hapoh ka 10 minit ka la ioh ban thep ia ka kol kaba nyngkong bad bud sa ar kol ha ka kylla step bad sa 3 kol ha ka kylla miet.

Ka jingiakhun haka 1 tarik Lber (Sngi Saitjain) kan long hapdeng ka Nongthymmai pyrshah ia ka Mawlai ha ka por 3 baje nohphai sngi. Ka Mawlai kala dep ban pynrem teng ia ka Nongthymmai da 2-1 ha ka 15 tarik u Kyllalyngkot.