Pynliem ka Ryntih ia ka Nongthymmai SC haduh 5-0 ha ka SPL; ioh hattrick u Andy Mawthoh

Syllad | The Rising MeghalayaMarch 31, 2024

Ka jingioh thep hat-trick da u Andy Mawthoh ka la pynlong ia ka Ryntih SC ba kan pynrem kput ia ka Nongthymmai SC da haduh 5-0 ha ka jingialehkai Shillong Premier League 2023-24 kaba la long ha madan SSA Stadium, First Ground, Polo haka 30 tarik Lber.

U Andy u la ioh ban pynkhih jait ha ka minit kaba 25 ha ka kylla step bad ha ka minit kaba 64 bad 68 ha ka kylla miet.Katba ia ki artylli kiwei pat ki kol la ioh thep da u Banehskhem Khongsdam ha ka mit kaba 75 bad 90+4.

Kane ka dei ka jingsdang jong ka jingialehkai na ka byna ka kylla kaba lai ha kaba ka Ryntih ka dang khmih lynti ia ka jingjop kaba nyngkong hadien ka jingiakhaid bad ka Mawlai SC ha ka jingiaialehkai sdang ka jong ki hashwa ba kan shah rem noh ha ka Shillong Lajong ha kaba sdang jong kane ka taiew, bad ioh ia ka jingjop ha kane ka jingiakhun pyrshah ia ka Nongthymmai.

Ha kane ka jingialehkai ka Nongthymmai ka la ioh ia ki katto katne tylli ki kabu ha kaba sdang jong ka jingialehkai hynrei kam shym la lah ban pynurlong ia ka jingangnud jong ka ha kaba kam shym la lah ban pynkhih jar. Katba ka Ryntih ka la sdang na ka jingialehkai kham suki na kaba sdang, hynrei dei tad hadien 20 minit ter ter ba ka la sdang ban banbor pyrshah ia ka kynhun kaba ialeh pyrshah.

Lyngba kane ka jingjop, ka Ryntih mynta ka la kiew na ka kyrdan kaba hynriew ha kane ka lympung ialehkai SPL 2023-24 sha ka kyrdan kaba lai bad kaba la mar ia ryngkat bad ka Mawlai SC kaba dang don sa kawei ka jingialehkai.

Ka jingialehkai kaba bud kan long hapdeng ka Mawlai bad ka Sawmer SC ka ban long ha ka 1 tarik Iaiong 2024 ha ka por 3 baje janmiet.