Pynliem ka Mawlai ia ka Sawmer da 7-2 ha ka jingialehkai SPL, ioh hattrick u Donlad Diengdoh

Syllad | The Rising MeghalayaApril 1, 2024

Ka Mawlai SC kaba dei ka lahduh ha ka samoi ialehkai ba la dep lyngba ka hattrick na u Donald Diengdoh ka la lah ban pynrem kput ia ka Sawmer SC da 7-2 kol ha ka jingialehkai jong ka Shillong Premier League 2023-24 kaba la long haka sngi Nyngkong ha Madan SSA Fist Ground, Polo, Shillong.

U Donald u la ioh ban thep ia kine ki laitylli ki kol ha ka minit kaba 22, kaba 24 bad ha ka minit kaba 57.

Kiwei pat ki rang ialehkai ka Mawlai kiba la ioh ban pynkhih jar ha kane ka jingialehkai ki kynthup ia u Robert Khongriah (34’), Fairming Suting (74’), Kevin Rymbai (75’) bad u Dajiedlang Wanshnong (ha ka minit kaba 86’).

Katba ka Sawmer kala ioh thep ia kine ki 2 tylli ki kol lyngba u Diego Khriam ha ka minit kaba 10 bad u Mark Austin Wanswett ha ka 88 minit.

Lyngba kane ka jingjop ka Mawlai mynta ka la wan ha ka kyrdan kaba nyngkong ha ka jingialehkai SPL da kaba ioh ban khur haduh 7 point bad ba ka dang hap ban iakhun sa ha kawei ka jingialehkai.

Ha kaba sdang jong ka jingialehkai ka Sawmer ka la ioh nyngkong ia ka lad ban pynkhih jar pyrshah ia ka Mawlai, hynrei hadien ka Mawlai ka la lah ban banbor pyrshah ia ki rangialehkai jong ka Sawmer bad ioh ban thep haduh 3 kol ha ka kylla step.

Haba wanphai sha ka kylla miet ka Mawlai ka la lah ban tehlakam ia ka bol bad pynjem khnap ia ki rangialehkai ka Sawmer da kaba ioh ban thep sa 4 kol. Hynrei shwa ban kut ka jingialehkai ka Sawmer ka la ioh ban thep sa 1 kol.

Ka jingiakhun ka ban long ha ka sngi ba Ar kan long hapdeng ka Nangkiew Irat SC pyrshah ia ka Langsning ha ka por 3 baje mynsngi.