Pynliem ka Lajong ia ka Laitkor, kiew sha ka kyrdan kaba ar ha ka Shillong Premier League

Syllad | The Rising MeghalayaSeptember 3, 2025

Ka lahduh jong ka lympung Shillong Premier League ka samoi ialehkai kaba la dep, ka Shillong Lajong FC ka la lah ba kan pynliem da 2-0 pyrshah ia ka Laitkor SC, ha ka jingiakhun kaba long ha madan jong ka SSA Stadium, First Ground, Polo haka 2 tarik Nailur.

Ia kine ki artylli ki kol la thep ia ki da u Deibormame Tongper (27’) bad Emanbha Marbaniang (74’), katba na ka liang ka Laitkor SC ka janmiet jong kane ka jingiakhun ka long ba ka la hap ba kan ialehkai noh satang 10 ngut ki player ha madan hadien ba ka la shah beh noh uwei u player na madan.

Ha kane ka janmiet jong kane ka jingiakhun u Deibormame u la ioh ban ialehkai nyngkong eh ha kane ka samoi kaba mynta bad ba u la ioh ban thep ia kane ka kol ha kaba u la ioh ban head ia ka bol kaba la wan lyngba ka freekick.

Hadien kane, ka Laitkor ruh kam shim la randien, hynrei ka la pyrshang lem ban ioh pynkhih lem ia ka jar, ha kaba ka kabu ksiar kaba la wan paw shynna ka dei lyngba u Freelyson Tariang, uba la ioh haduh artylli ki kabu ksiar kawei ka wan hadien ba ka bol ba u la ioh ba un head ka la kiew shalor ka dieng kol, kaba ar pat kadei kaba u la ioh ban shut jam bha ia ka bol kaba la lait hi phar sharud jong ka kol.

Haba wan ban  ia bteng ia ka kylla miet u Richarles Rani u la hap ban mih noh shabar ka madan iakhun ha ka minit kaba 66 hadien ba u la ioh ban pdiang beit beit da ka red card na u referee u bah Jeffrey June Shabong halor ka foul pyrshah ia uwei na ki player ka Lajong, kaba pynlong ia ka kynhun ba ha ki minit kiba sah ba kan hap ba kan iakhun noh satang 10 ki player ha madan haduh ban da kut ka jingiakhun.

Wat la katta ruh, ki rang ialehkai ka Laitkor SC ki iai pyrshang beit ban lah ban ioh pynphai ia kine ki kol katno tam lei lei haba la iarap ban kyrshan lem ia ki da ki paid nongkyrshan kiba la mih paidbah ban ai mynsiem ia la ki jong ki player.

Da kane ka jingjop, ka Lajong mynta ka la ioh ba kan khur 7 point bad ban bat ia ka kyrdan kaba ark ham hadien ka kynhun ialehkai ka Nangkiew Irat kaba la ioh khur 9 point, katba ka Laitkor SC ka la ioh ba kan khur shwa tang 3 point bad ba kan don ha ka kyrdan kaba 6 .

Ka jingiakhun haka 3 tarik Nailur kan long hapdeng ka Mylliem pyrshah ia ka Malki kaban long ha ka por 4:30 nohphai sngi. Kane ka jingiakhun kan dei artad ka jingialehkai ba khatduh ka kylla kaba lai (Rd-3).