Pynkylla ka Sorkar ia ki kyndon ka ‘Meghalaya Day Award’, kyntiew ia ka khusnam sha ka 2 lak

Syllad | The Rising MeghalayaJuly 11, 2024

Ka Sorkar Jylla ha ka 10 tarik Naitung ka la mynjur halor ka jingpynkylla thymmai ia ki kyndon kiba iadei bad ka jingai ia ka khusnam ‘Meghalaya Day Award.’

 “Ngi la wanrah ia artylli ki jingpynkylla halor kane.Kaba nyngkong ka long ba ngi la rai ban kyntiew ia ka khusnam na ka T.1 lak sha ka T.2 lak. Kumba phi ia tip ba kane ka dei kaba la leh khatduh eh ha u snem 2013.Kumta, ngi sngew ba ka jingai khusnam kaba T.1 lak kam long satia kaba iahap bad biang, kumta ngi la rai ban kyntiew noh sha ka ar shah,” ong u Myntri Rangbah ka Jylla u Conrad K Sangma haba kren sha ki lad pathai khubor hadien ka jingialang jong ka Kynhun Myntri.

Nalor kata u la ong ruh ba sa kawei pat ka rai ba la shim ka long ba mynta lah ban aplai online, kaba mut ba kam donkam shuh ban phah lyngba ka tnad ba dei khmih.

“Mynta ki briew ki lah ruh ban aijingmynjur ia kiwei pat lyngba ka online system, kata kumba leh ia ka khusnam Padmashree lem bad kiwei pat ki khusnam jong ka Ri. Ngi la pyniar shuh shuh ia ki sienjam khnang ba kin nangmih shuh shuh ki briew ki ban aijingmynjur beit beit ia ki kyrtenglyngba ka online system,” u la ong.