Pynkylla ka Sorkar ia ka Heritage Act ban ioh rung ki Jingkieng Jri ha ka thup “World Heritage Site”

Syllad | The Rising MeghalayaJune 5, 2025

Ka sorkar Jylla ka la shim ia ka rai ban pynkhlain ia ki nongrim jong ka khnang ban pynthikna ba ki Jingkieng Jri ne ”Living root Bridges’ kin ioh rung ha ka thup kum ki ‘World Heritage Site’.

Kumta ruh na ka liang ka kynhun Myntri ka sorkar jylla ka la ai ka jingmynjur ia ki Amendment jong ka Meghalaya Heritage Act, 2025 ha ka jingialang ba la pyniaid da u Myntri Rangbah ka jylla u Conrad K Sangma ha ka 4 tarik Jylliew.

Haba kren sha ki lad pathai khubor hadien ka jingialang, u Conrad u la ong ka thong kaba kongsan tam jong kane ka Amendment jong ka Meghalaya Heritage Act ka long ban pynrung ia kaei kaba ngi khot “Living Heritage”, ne ki jingtei jong uba rim.

“Ia kane la leh katkum ki jingthoh jong ngi ba la phah sha ka UNESCO ba kan pynbna noh ia ki Jingkieng Jri kum ki World Heritage Site bad ma ngi ban nang pynkhlain ia ki nongrim, ngi la pynkylla ia la ka jong ka Meghalaya Heritage Act ban pynrung ia ki kyndon ki ban pynbna ia ki jingtei jong uba rim kiba im (living heritage) kum ki Jingkieng Jri kum shibynta na ki jaka ba ai jingiada” ula ong.

Nalor kata u Myntri Rangbah u pyntip ka Sorkar ka la rai ruh ban pyllait noh ia ka jingthied ia ki jaka ne long trai ia ki jaka ba don ki jingtei uba rim kiba im, lada ki dei kiba longtrai da ki Shnong ki thaw ne ka Imlang sahlang.

“Ngi la rai ha ka Kynhun Myntri ba ka Heritage Act kaba rim, ki don ki kyndon ba donkam ia ka Sorkar ban hap thied ia ki jaka lane ki nongkynti ba kan pynbna kum ki jaka ban ai jingiada. Mynta ngi la pynrung ia kane ka bynta kaba ong ba ka Sorkar ka lah ban pyllait ia ka jingthied ia ki  jaka ne shimti ia ki jaka ba don ki jingtei jong uba rim lada ki dei kiba long trai da ki shnong ki thaw ne ka imlang sahlang, kaba mut ba kam long kongsan shuh ba ka Sorkar kan hap thied ia ki jaka lane ban long trai namar ka dei kaba la long trai da ki shnong ki thaw ne ka imlang sahlang” u la bynrap.