Pynkylla ka iingkashari ia ka hukum buh por shong dukan ki nongdie madan ha Khyndailad

Syllad | The Rising MeghalayaJuly 17, 2025

Ka Iingkashari Meghalaya High Court ka la pynkylla ia ka hukum ba hashwa da kaba pynjlan ia ka por na ka bynta ki nongshong dukan die madan ba kin buh ia ki dukan jong ki bad ban lum noh hapoh ka por ba la buh ha Khyndailad.

Kane ka rai jong ka iiingkashari ka la wan long haba jubab ia ka aplikeshon ba la mudui da ka seng ki nongdie madan ka Meghalaya and Greater Shillong Progressive Hawkers and Street Vendors Association.

Ka Iingkashari ka la pynjlan ia ka por shong die madan da kaba ailad ia ki nongdie ba kin buh ia ki dukan jong ki naduh ka por 12 baje mynsngi haduh ka por 2:15 nohphai sngi bad naduh ka por 7 baje janmiet haduh ka por 9:15 mynmiet.

Hadien ba la shong bishar ia ka PIL haka sngi Balang, ka Division Bench kaba kynthup ia u Chief Justice IP Mukerji bad u Justice W Diengdoh ka ong, “Haba shimkhia ia kine ki jingiasaid ba marpyrshah, ngi la pynkylla noh ia ka hukum ba la pynmih ha ka 3 tarik Naitung 2025, da kaba pynjlan ia ka por da shiteng kynta bad khatsan minit ha ka por shong dukan ha ka por janmiet ba kin buh ia ki dukan bad ba kin lum pat ia ki, bad kane kan treikam kumjuh na ka bynta kito kiba shong dukan ha ka por mynmiet.

“Ha kawei pat ka kyntien la shah ia ki nongshong die madan ba kin ioh lad ban sdang pynkhreh ia ki dukan jong ki naduh ka por 12 baje mynsngi bad sdang lum pat naduh ka por 2 baje nohphai sngi bad ban sdang biang ban pynkhreh naduh ka por 7 baje janmiet bad ban lum hapoh ka por 9:15 mynmiet,” ka la bynrap.

Ka Iingkashari ka la bthah ruh ba ia kine ki kynta ba la pynbeit thymmai yn pyntreikam hapoh ka jingkhmih bniah da ki bor sorkar bad u Special Officer.

Nalor kata, ka Tnad Traffic ruh ka dei ban kham pynbun ia ki pulit pyniaid kali ha kane ka thain ha kine ki kynta shong dukan madan ba la pynjlan.