Pynkut noh iaka jingrakhe Foundation Day ka Ummulong Presbyterian College, kubur u ma Sniawbhalang iaka jingduna ki jaka pule

Syllad | The Rising MeghalayaJuly 22, 2023

Ka Ummulong Presbyterian College haka sngi Thohdieng kala pynkut iaka jingrakhe foundation day ne ka sngi seng iaka kolej haka jingialang kaba long ha phyllaw ka skul Ummulong Presbyterian Higher Secondary School, Ummulong. U Deputy Chief Minister ka Jylla ma Sniawbhalang Dhar ula long kum u kongsan bad ula pyllait paidbah ruh iaka souvenir ka kolej.

U Sniawbhalang Dhar uba long ruh u MLA ka Nartiang ula kubur iaka jingduna ki kolej ha rilum Jaintia. Ula ong ruh ba ka Kiang Nangbah Government College kala khapngiah bad “Lada peit iaka Kiang Nangbah Government College kala long kum ka iew bala bun ki samla pule bad la hap ban phiah bad ka morning shift.”

Ula ong ba ki khynnah skul kila nang bun, hynrei ka jaka pule ki duna bad ki khynnah iakhun matrik da ki phew hajar ngut haka shisnem bad kiba ioh iaka 80 percent ruh ki dang shitom ban ioh klas. “Lada kren shaphang ki kolej kiba don ha rilum Jaintia, teng teng kum ki nongmihkhmat ngi sngewlehrain ban pynpaw namar ba dang duna haki liang baroh,” la ong u ma Sniawbhalang Dhar. Ha kajuh ka por ula kyntu iaki khynnah bad samla pule ban trei shitom haka pule puthi bad ban kim dei than ban shaniah haka kam sorkar ha kaba iadei bad ka lad iohkam iohjam bad ban phaikhmat ruh sha ki private sector bad ki company.

Ula kitbok kitrwiang iaki nongpyniaid ka Ummulong ka Presbyterian Kolej ban kin lah ban iaid shakhmat ban sam jingnang jingstad iaki samla pule ka thain.

La pynphuh pynphieng ia kane ka jinglehkmen da ki jingrwai jingshad bad jingiakop Mr. & Miss Ummulong Presbyterian College.