Pynkut ka Jowai Presbyterian Higher Secondary School iaka jingrakhe jubili rupa

Syllad | The Rising MeghalayaJune 7, 2024

Ka Jowai Presbyterian Higher Secondary School haka 7 tarik Jylliew kala pynkut noh iaka noh iaka jinglehkmen jubili rupa. Kane ka skul ka dei kaba la seng na ka Balang Jowai Presbyterian naduh u snem 1999.

Kiba iadonlang ha kane ka sngi pynkut ki kynthup ia u MP Rajya Sabha Dr. WR Kharlukhi kum u kongsan, MLA ka Jowai Ma Wailadmiki Shylla, u Dolloi ka Elaka Jowai Ma Puramon Kynjing, ki nongsharai balang, ki longkmie longkpa, ki khynnah skul kiba mynta kumjuh kiba pyndep ia ki jingpule ha kine ki 25 snem ba la dep na katei ka jaka, ki nongshah khot sngewbha bad kiwei kiwei.

Ha kane ka sngi la pyllait ruh iaki maw nongrim ban sah jingkynmaw kumjuh ka kot sah kynmaw (Souvenir) jong ka skul ba la pyllait da u Rev. E. Nongpluh bad ka jingpynher iaki 25 tylli ki balloon da u Tbn. BN Lamare kumjuh ka jingpynkup burom iaki nonghikai jong kane ka skul.

U Dr. WR. Kharlukhi haka jingkren ula ai ka jingiaroh iaka Balang bad ki nongpyniaid kiba don ka jingiohi jngai iaka jingdonkam ka pule puthi bad ruh kiba la kyrshan ban pynbit pynbiang ia kane ka skul kumba ka long mynta. Ula kyntu ruh iaki khynnah ba kidei ban trei shitom bad sheptieng ia U Blei khnang ba kino kino ki jingialeh ne ki thong kin urlong haka jingim ka jong ki.

U Wailadmiki Shylla haka jingkren ula ong, ban seng iaka skul kamdei ka kam kaba suk, kumta ula iaroh iaki nongpyniaid jong kane ka skul kiba la trei shitom khlem shong thait na ka bynta ban pynnang pynstad iaki khynnah. Ha kajuh ka por ula kyntu iaki bor pyniaid jong ka skul ba kin bteng ban trei shitom shuh shuh khnang ban pynthikna ba ka skul kan nangroi bad kan nangkiew shaphrang ha ka lynti iaid ka jong ka.

Ha kaba iadei bad ki jingdonkam jong ka skul ba la aiti lyngba ka dorkhas, na ka liang u MP bad MLA kila kular ban pyrshang ban iakren bad u Myntri Rangbah.

Kane ka jingrakhe ka la long kaba iphuh iphieng da ka jingshim bynta ki khynnah skul haki jingrwai bad jingshad bad la pynkut da ka jingsam prize sha ki nongjop kiba la shim bynta haki jingiakop bapher bapher ha ka jingrakhe iaka tamasa Jubili Rupa.

Ia kane ka skul la sdang tang haka kyrdan secondary bad ha snem 2011 la kyntiew sha ka Higher Secondary School da kaba sdang shuwa iaka Arts Stream. Ka enrollment jong ki khynnah kata haduh u snem 2023 ka long 522 ngut.