Pynkupbor ka Elite Pathway Program iaki nongialehkai ka Meghalaya ban kiew ha ki kam ialehkai

Syllad | The Rising MeghalayaJune 20, 2023

Ka Meghalaya State Olympic Association (MSOA) ryngkat ka ARMS – PT/EDGE 10 – SPORTALITY, da ka jingiatrei lang bad ka Department of Sports & Youth Affairs ka sorkar jylla, kala pynbna ia ka jingsdang biang ka Elite Pathway Training 2^nd Camp, kaba la long ha ka 17 bad 19tarik Jylliew ha JN Stadium, Polo Shillong.

Ka thong jong katei ka prokram ka long ban pynkylla ia ka rukom pynmih ia ki nongialehkai na kane ka thain kata da kaba sdang ban hikai, pyntbit ia ki naduh ba dang rit bad buddien haduh ba kin da pura. Katei ka Elite Pathway Program ka long ruh ka bynta ba kongsan jong ka STAR Program, kaba la pynmih da ka sorkar jylla bad pyntreikam pat da ka Edge10 Group, ka kynhun na Australia ryngkat ka Meghalaya State Olympic Association, ban wad bad pyntbit ia ki riew donsap kiba don ha ka jylla.

Ha kane sngi la iadonlang u Sampat Kumar, IAS, Principal Secretary, Programme Implementation & Evaluation Department, ka sorkar jylla nalor u  Ian Campbell, u rangialehkai Olympic uba la dep ban mihkhmat ia ka Australia ha ka 1980 Olympics. Nalorkine la donlang ruh u Bah John F Kharshiing, Working President ka Meghalaya State Olympic Association, Bah PB War Nongbri, Assistant Director jong ka Department of Sports and Youth Affairs, kiba la pashat lang katto katne ki mat ba kongsan. Katba na ka liang u Bah P. Laloo, Joint Secretary ka Meghalaya State Olympic Association bad Kong IsawandaLaloo, Director ka tnad Sports and Youth Affairs, ka sorkar jylla ki la pynpaw ia ka jingkmen ryngkat ka jingkyrmen ba katei ka jingiatrei lang bad ka EPP kan wanrah ia u soh ka jingjop.

U Bah John Kharshiing haba kren ha kane ka jingialang u la ong, “Nga dap da ka jingkmen ban sakhi ia ka Elite Pathway Program na bynta ki nongialehkai ka Meghalaya. Kane ka prokram da ka jingiatreilang bad ka MSOA bad ruh ka Edge10 Group, ka la plie lad plie lynti ban lap ia ki riew donsap bad ruh kumno ban pyntbit ia ki nongialehkai. Kane ka prokram ka long ruh kum ka jingsdang jong ka jingkyrmen na bynta ki nongialehkai ba dang khie da kaba plie iaka lad ba kin ioh ia ki jingkilan met kiba paka ryngkat ka jingdonlang ki nonghikai kiba kynsai. Nga pynpaw ruh ka jingsngewnguh ia ka jingaiti bad ka jingtbit jong u Ian Campbell, u nongialehkai Olympic ba pawnam bad ka kynhun kiba lamkhmat ia kane ka prokram.”

Ha kajuh ka por u ong ruh ba ki dap ka jingsngewnguh ia ka jingkyrshan kaba radbah ba ki ioh na u Myntri Rangbah ka Jylla, Conrad K Sangam bad ruh u Myntri ka tnad Bah Shakliar Warjri kiba da ka jingtrei borbah jong ki ka Meghalaya ka la sdang mynta ban pyni ia u soh.

Na ka liang u Ian Campbell ha ka jingkren u la ong ba kane ka jylla nalor ba ka don ia ka mariang kaba ithiang u lap ruh ba ki don bun ki riewdonsap kiba dang khie. “Hadien ba nga la dep ban peit ia palat 14,500 ngut ki nongialehkai lyngba ki jingialehkai ba harukom ha baroh kawei ka jylla, nga sdang ban sngewhtuh ia ka jingbun ki riewdonsap kaba don ha ki. Ka jingtbit, ka jinglah kaba la don lypa ha ki, ka pyni ia ka jingkyrmen na ka bynta ka lawei,” u la ong da kaba pynpaw ruh ia ka jingsngewnguh ia u Working President ka MSOA  bad ka kynhun kiba la shaniah ha u ban pyniaid ia katei ka kam shakhmat ban lap ia ki nongialehkai kiba kynsai bad kiba don ruh ka jinglah ba kin kiew shuh shuh ha ki kam ialehkai ba bunjait.

Shuh shuh u ong ruh ba ka thong ka long ban lah sei uwei lada ym lah shibun, ia ki nongialhekai ban mihkhmat ia ka jylla ha ki lympung ialehkai jong ki ri ka pyrthei (International professional athlete) kiban aireng ha ki lympung ialehkai kiba heh tam ha ka pyrthei.

Lyngba ka EPP ki la don haduh 14,500 ngut ki khynnah kiba la wan ban pyni ia ka jigntbit jong ki ha kylleng ki bynta jong ka jylla bad na kine ki la don haduh 200 ngut ei ei kiba la shah jied na ka bynta katei EPP. Kine ki nongialehkai ki don mynta ha ka prokram ba shisnem kaba la phiah ha ki ar bynta kaba kynthup ia ki jinghikai pyntbit ba ai da ki coach bad ruh ka jingpeitngor kaba man ka taiew ban peit ia ka jingtbit kaba ki don.

Ka bynta kaba ar pat jong ka EPP ka long ka jingkilan met kaba markhmat ha SAI Centre NEHU hakaba ki nongialehkai ba la shah jied ki ioh ia ka jinghikai hapoh ka jingialam jong u Ian Campbell bad ka kynhun. Kane ka jinghikai ki ioh ruh na ki coach ba pawnam da kaba ai nuksa ba ha u Iaiong 2023 ki nongialehkai ki ioh ruh ia ka jinghikai na u rangialehkai ba rim ka Manchester United U Jesper Olsen nalor kiwei kiwei ki coach.

Ha kajuh ka por na ka liang ka tnad Ialehkai ka jylla ka buddien bad peitngor ia kitei ki nongialehkai bad ka buh thong ruh ba kitei ki nongialehkai kin ioh ia ka jinghikai kaba paka tam eh. Nalorkata, ka Mass Talent Identification Program kan iai bteng ban wad ia ki nongialehkai kiba don ia katei ka jingtbit lypa. Ka tnad ka don ruh ka jingkyrmen ba da ka jingiatrei lagn bad ka MSOA ryngkat ka Edge10 Group kin ioh ban pynwandur shuh shuh ia ki kam ialehkai ha kane ka jylla da kaba pynkupbor bad plie lad iaki nongialehkai ba kin khie rasong wat ha ki lympung iakhun jong ki ri ka pyrthei.

Ka jingpyrshang ia ki khynnah ha kane ka camp ka kynthup ia ka vertical jump, compass drill, 10m ladder run bad ka 20m sprint,