Pynkup burom u Lat ka Jylla ia u Steve Jyrwa, u nongjop ia ka India’s Best Dancer Season 4

Syllad | The Rising MeghalayaNovember 20, 2024

U Lat ka jylla Meghalaya u CH Vijayashankar ha ka 19 tarik Naiwieng u la pynkup burom ia u samla Steve Jyrwa uba dei u lahduh ha ka jingiakob shad ‘India’s Best Dancer Season 4.’

U Lat u la ai khublei ia u Steve halor kane ka jingjop kaba khraw jong u kaba la wanrah ia ka nam, ka jingsngew sarong bad ka jingithuh ia ka Meghalaya ha ka rynsan jong ka ri bad u la pynkup burom da kaba aiti ia ka mememto ha ryngkat ka jain ryndia.

U Lat u la pyrto ruh ia ka jingtrei minit bad ka jingtrei shitom jong u Steve uba don ia ka sap kaba kyrpang kaba long ruh kum ka jingai mynsiem na ka bynta kiwei pat ki samla ka Jylla. U la pynshlur ruh ia u ba un iai bteng ban trei shitom bad pynshlur ruh ia u ba un mihkhmat ia ka ri India sha ki rynsan iakob jong ki ri ka pyrthei.

Nalor kata u Lat u la basnjur halor ka jingkongsan ban saindur ia ki sap ki phong bad kyntu ia ki samla ka jylla Meghalaya ba kin beh sha ka thong ka jingangnud ka jong ki lyngba ka jingtrei minot. U kyrmen skhem ruh ba kane ka jingjop jong u Steve kan pynshlur bad aimynsiem ia kiwei pat kiba don ia ka sap shad ba kin wad ia ki lad ki lynti ban noh synniang ia k jingriewspah jong ka kolshor jong ka jylla.

Na ka liang u Steve Jyrwa u la pynpaw ka jingsngewnguh ia ki kyntien pynshlur bad ai mynsiem jong u Lat bad pynpaw ruh halor k jingiaid lynti ka jong u ban poi sha kane ka thong jong ka jingjop, da kaba pynpaw ruh halor ka jingkyrshan kaba u la ioh na la iing, ki nonghikai bad ki paidbah ka jylla Meghalaya.