Pynkup burom ka Sohkha Mission Village Durbar iaki samla kiba wan shakhmat haki eksam

Syllad | The Rising MeghalayaDecember 29, 2023

Ka Sohkha Mission Village Durbar ka la pynlong ia ka jingai khusnam ia ki samla pule ka shnong kiba la jop bad wan sha khmat ha ki exam bapher bapher ha ka 28 tarik Nohprah.

U Bah Holando Lamin MDC ka thain u la long kum u kongsan ha kane sngi. Haba kren kum kongsan ula iaroh ia ka shnong Sohkha Mission kaba la iohi jingai ban pynshlur ia ki khynnah pule ban trei minot ban poi shakhmat ha ki exam bapher bapher.

U la kyntu ruh ia ki khynnah pule ban trei shitom ban wanrah nam ia ka iing ka sem, ka shnong bad ka thain hi baroh kawei. U la ong ruh ban ym ailad ia ka jingduk ban khanglad ia ki ban poi sha khmat ha ki jingpule bad ba kin long kiba jan sha U Blei ban lait na ki jingsniew.

Ka kong Dolly Khonglah, Secretary Meghalaya International Chambers of Commerce, kala ai jingiaroh ia ka shnong ia ka jing pynshlur ia ki samla pule da kaba ai kum kine ki khusnam sha ki samla pule ka shnong kiba la wan sha khmat ha ki exam bapher bapher ba ki lah ialeh. Kala ban ruh ia ki samla ban ialeh ban kiew sha khmat kumba long kiwei kiwei ki jaitbynriew ha ka ri. Kala ong ruh ba lada kiwei ki lah, balei ba ki samla jong ngi kin ym lah.

U Bah Monjurlang Pohlong Sub-Inspector Statistic Wapung C&RD Block, u la kyntu jur ia ki samla pule ban long kiba don ka discipline ha ka jingim jong ki bad ban nang ban bate ia ka por khnang ba kin ioh ia ka jingjop ha ka jingim. U Bah Precious Stone Suchen uba long u Waheh Shnong jong ka Sohkha Mission u la ai ka jingkren bad pynshlur ia ki Samla pule jong ka Shnong ba kin long kiba minot bad ban ialeh katba lah ban poi shakhmat ha ka jingpule khamtam ha kane ka juk competition kaba mynta.

La pyniaid ia kane ka program da u Bah Handleson Lamin Gadew, bad la pynshongshit ia kane ka jingialang da ki jingrwai na ki samla ka shnong kynthup ia u samla Sardis Dkhar bad ka samla Barikynti Khonglah. La ioh ia ka jing kren ai khublei u Bah Marshall Manner, General Secretary jong ka shnong.