Pynkup burom ka Sarot I Man ïaki nongthoh khubor ka rilum Jaintia

Syllad | The Rising MeghalayaMay 3, 2022

Ka Sarot I Man (SIM) ka kynhun treimon sngewbha jong ki 11 ngut shi paralok na Jowai ka la pynkup burom kyrpang ïaki nongthoh khubor na rilum Jaintia hapoh ka lama Jaiñtia Journalist Association (JJA) kaba la noh synñiang sha ka imlang ka sahlang da ka kam thoh khubor.

Ïa kane ka jingpynkup burom la pynlong ha Yadalada Villa kaba ha Kdohhati Dulong Jowai haka sngi ba Ar. Ka 3 tarik Jymmang dei ruh ka sngi kyrpang iaki nongpathai khubor “World Press Freedom Day” ka sngi ban pynkymaw iaka sorkar ban pynneh iaka hok jong ki nongthoh khubor.

Ïaka jingïalang pynkup burom la pynïaid da u Ma Kyllimot Lhuid bad la ïoh ka jingkren na u Ma Riqouma Rq Laloo kumjuh na u General Secretary ka JJA u Ma Russel Nongrum uba long ruh u editor jong u syllad.com haka jingïadonlang ki dkhot ka Sarot I Man.

U General Secretary ka JJA u Ma Russel Nongrum haka jingkren ula ai khublei ïaki dkhot ka Sarot I Man kaba la ithuh ïaka jingshakri jong ki nongpathai khubor ka district. “Kane ka jingithuh ka pynkmen ïa ngi bad ai mynsiem ïa uwei pa uwei u dkhot ka JJA ban nangtrei shitom haka kam thoh khubor”, ong u Ma Nongrum.