Pynkup burom ka NPYF ha Jowai iaki 137 ngut kiba pass bha haka eksam MBOSE

Syllad | The Rising MeghalayaJuly 6, 2025

Ka National People’s Youth Front (NPYF), Meghalaya State Unit ryngkat ka NPYF Jowai Block ka la pynkup burom ïa ki 137 ngut ki samla pass bha haka eksamin SSLC bad HSSLC jong ka MBOSE 2025.

Na kine, 74 ngut ki dei kiba la wan shakhmat ha ka SSLC, katba 63 ngut pat ha ka HSSLC. La sam ïa ki khusnam da u MLA ka Jowai uba long ruh u State President ka NPYF, Ma Wailadmiki Shylla ha ka jingïalang kaba la long ha District Library Auditorium, Jowai.

Ha ka jingkren jong u, Ma Shylla u la ong ba kane kadei ka sien nyngkong ba ka NPYF Jowai Block ka pynlong ïa ka jingpynkup burom kum ka dak ban ai ithuh iaka jingtrei shitom ki samla ha ka pule puthi bad ban long nuksa ïa kiwei pat. U la ai jingïaroh kyrpang ruh ïa ka Government Girls’ Higher Secondary School, Jowai kaba la lah ban pynmih ïa kawei ka khynnah haka Top-10 HSSLC (Commerce) ha ka sien nyngkong.

La ioh ruh ka jingkren na Ma Omesa Shylla, Ma Samehi Laloo President NPYF Jowai Block bad ki katto katne ki samla ba shah pynkup burom ki kynthup ka Sophia Niang (6th Top HSSLC Commerce – 92.20%) bad ka Geliloth Nazarene S. Kyndiah (91.83% SSLC).