Pynkup burom ka NPP Nartiang ia u symbud myntri rangbah ka Jylla ma Sniawbhalang Dhar

Syllad | The Rising MeghalayaApril 4, 2023

Ka National People’s Party (NPP) 1-Nartiang Constituency kala pynkup burom ia u symbud myntri rangbah ka Jylla u Sniawbhalang Dhar uba la jop iaka kam MLA la saw sien kynthih na kane ka thain haka sngi Saitjain ka taiew kaba la dep.

Ia kane ka jingialang pynkup burom la pynlong ha iing dorbar ka shnong Wahiajer haka jingialang kaba pyniaid da u Hamkom Kynriam president ka NPP 1-Nartiang Block Constituency.

U Ma Briwon Pohshna Adviser jong ka NPP 1-Nartiang constituency, haba kren ula iaroh Ia ki kam ba bha jong u ma Sniawbhalang Dhar ha kine snem ba la leit bad ula kyrpad ruh Ia u MLA ban dang wahrah shuh shuh ki kam pynroi naka bynta ka 1-Nartiang Constituency.

U Ma Sniawbhalang Dhar, ula ai khublei ia baroh ki nongialam bad ki nongkyrshan ka party ki ba la trei shitom ban pynjop donburom biang ia u mynta ka kynti. U la ong ba kadei ka burom kaba khraw ia u kum u nongmihkhmat namar ka jingieid bad jingstad jong ki paidbah nongshong shnong ka constituency ban pynjop bunsien ia u haduh ban da iohbat iaka kyrdan symbud Myntri Rangbah jong ka sorkar Meghalaya.

U la kubur ba kum u briew um lah ban leh lut nadong shadong kat kum ka jingkwah ki paidbah, hynrei u la pyrshang katba lah ban wanrah ia ka roi ka par ha ka constituency. U la kular ruh ban trei shitom bad ban leh khambha shuh shuh ia ka constituency ban wanrah iaki kam pynroi haka ioh ka kot, ka rep ka riang, ka pulei puthi, ka koit ka khiah bad kiwei kiwei ban kyntiew iaka roi ka par ka thain.

Ha kane ka jingialang la iadonlang u CEM JHADC, Ma Thombor Shiwat uba la ai iaka kyntien ai khublei. La ioh ruh iaka jingrwai na u Deibor Suting naka shnong Thadmusem.