Pynkup burom ka MAA ia u Rikangku uba la kawang haduh 51.91 metre haka Kids Javelin

Syllad | The Rising MeghalayaDecember 14, 2024

Ka Meghalaya Athletic Association mynta ka sngi thohdieng jong ka taiew, ka la wan shakhmat ba kan pynkup burom da kaba aiti ia ka song pisa sha u Rikangku. D. Sangma, hadien ba u la ioh ban khur ia ka takma rnong na ka 39th National Junior Athletics Championship, kaba la wan lyngba ka jingiakob ka Kids Javelin hadien ba u la lah ban kawang ia ka jingjngai kaba long 51.91 metre.

Ia ka jingialang la pynlong ha conference room ka Meghalaya state Olympic Association, J.N Stadium, Polo, ha kaba la sakhi lang da u president jong ka MAA u bah EMH Passah, la ioh ruh ia ka jingkren na u Secretary u bah Finely L. Pariat bad don lang u bah Joel Marbaniang vice president ka MAA.

Haba kren ha kane ka jingialang u bah Finely u pynpaw ia ka jingkmen ba u Rikangku un kylla long u khynnah ialehkai athletic uba ar na kane ka jylla ban lah ban ioh khur ia ka takma na National Junior Athletics Championship kaba la wan lyngba ka jingiatreilang bad ka tnat sports ha kaba la sdang pat mynta ban lah ban ioh kheit ia ki soh bathiang.

U bah Finely um lah ban khlem da ai khublei ia ka kong Daicy Marwein kaba dei ka athletic coach ka jylla ryngkat u Pleasantly Synnah kiba la trei shitom ban hikai ia u lyngba ka online namar ba u dei uba shong ba sah sha Baghmara, hynrei  kane ka buit ka la lah pat ban pynlong ia u  ban ialehkai bha tad haduh ba un da ioh ban khur ia kane ka takma.

U bah Finely u kam ba kane ka takma rnong ba la khur da u Rikangku ka long ruh kum ka jingkyrkhu ba n sha lyndet  ia ka jylla ba kan lah ban sei madan ia ki khynnah ialehkai ba kum kine bad bynrap ba wat na ka liang ki briew ka Athletics Federation of India  ki pynpaw ba u Rikangku u dei  khynnah ba don bha ka lawei kaba phyrnai tangba kiei kiei baroh kan shong pat ba da kumno yn lah shuh shuh ban nang sain dur ia ka jigim ialehkai ka jong u.