Pynkup burom ka KSU Kupli ia ki khynnah ba pass bha ha ki eksamin bapher bapher

Syllad | The Rising MeghalayaSeptember 1, 2025

Ka Khasi Students Union (KSU) Kupli Area Circle ha ka 30 tarik Nailar ka la pynkup burom ia ki samla pule ka thain kiba lehbha ha ki eksamin bapher bapher ha ka Shnong Saphai kaba long ruh kum ka dak ban pynshlur bad ai mynsiem ia ki samla pule ka thain ba kin iai minot ha ki jingpule ki jong ki.

Ha kane ka sngi la ia don lang ruh u President KSU-CEC u samla Lambokstarwell Marngar kum u kongsan bad u Shiningstar Kharbihkhiew Environment Secretary KSU ka Central Body kum u Symbud kongsan nalor ki nongialam ka KSU West Jaintia Hills District Unit, kata naduh u President Laitphar Syngkrem, General secretary Leningrad Tariang ba kiwei kiwei.

Hashwa ban pynkup burom la pynlong ia ka jingialang ba lyngkot ba la pyniaid da u samla Leiki Richard Tyngkan, General secretary ka KSU Kupli Area Circle bad la pdiang burom da u samla Balawantei Suchiang President ka KSU Kupli Area Circle.

Kiwei pat kiba la ia don lang ki kynthup na ka synjuk ki 13 Waheh Shnong ka thain nalor u Officer Incharge ka Saphai Police Outpost u R. Suiam,  P.K Shullet Engineer ka tnad MeECL bad u Risalan Rymbai incharge ka tnad Fire Service Saphai bad i Dr. Carius Passah bad kiwei kiwei ki riew pawkhmat ka thain

Ha kane ka sngi la ioh ruh ban pynlong da ka drawing competition na ka bynta heprit na ki katto katne tylli ki skul bad ruh ka debate competition halor ka phang ‘Social Media’.

La pynkut ia ka prokram da kaba sam ia ki khusnam sha ki samla pule bad ka jingpynkup burom sha ki rangbah  ba ioh ia ka kyrdan ophisar bad ia ki Rangbah Shnong jong ka thain.