Pynkup burom ka KSU bad Dorbar Shnong Nongbareh Lyntiar ia kiba pass bha ha ka SSLC

Syllad | The Rising MeghalayaJune 9, 2025

Ka Khasi Students’ Union (KSU) Nongbareh Lyntiar Unit kaba hap hapoh ka jingpeit jingkhmih ka KSU War Jaintia Circle ha ryngkat ka jingiatreilang bad ka shnong Nongbareh haka sngi Saitjain ki la ioh ban pynkup burom ia ki samla pule jong ka shnong Nongbareh kiba la wan shakhmat ha ka eksamin SSLC.

Kane ka jingsam khusnam ka long ruh shibynta kum ka dak ban nangpynshlur bad ai mynsiem ia ki khynnah ba kin nangkiew shaphrang ha ki jingpule jong ki bad khnang ba kin wanrah ia ka nam ka burom ia ka shnong ka thaw, ka thaiñ War Jaintia bad Jaidbynriew Khasi hi baroh kawei.

Ha kane ka jingialang la ioh ka jingkren na u samla Laitphar Syngkrem President KSU-WJH u ba long ruh u kongsan ha kane ka sngi kumjuh na u Bah Roosevelt Lamin Rangbah Shnong Nongbareh Lyntiar bad uba bat ruh kum u President ka KSU Nongbareh Lyntiar Unit bad na u Bah Fifthly Carlton Manner Chairman Nongbareh Lyntiar.

Baroh ki nongkren ki la ai ia ki kyntien kyntu kynpham bad ai mynsiem ia ki khynnah skul ba kin nangtrei shitom ban wad ia ka jingnang jingstad kaba long ka lawei ba phyrnai ka ban ialam ruh ia ki ban pyniar ia la ki jingmut jingpyrkhat bad sei ki riewstad riew shemphang na ka thaiñ Ri War Jaintia.

Ha kane ka sngi la wan ai mynsiem ruh da ki kmie ki kpa jong ki khynnah bad ki nonghikai kumjuh ki nongshong shnong jong ka shnong Nongbareh Lyntiar.