Pynkup burom ka Jowai Consumers Cooperative Store ia u SQ Sumer u nongseng ba iohi jngai ban iarap ia kiba duk ba kyrduh

Syllad | The Rising MeghalayaFebruary 1, 2022

Ka Jowai Consumers Co-operative Store kala pynkup burom ïa u Ma S Quotient Sumer uwei na ki nongseng (Founder member) ka Cooperative Society kaba la ai jingshakri iaka sor Jowai bad ki shnong ba marjan khamtam ia kiba duk ba kyrduh naduh u snem 1963.

U Chairman ka Jowai Consumers Co-operative Store, u OC Lakiang bad u Hunmon Sutnga Secretary haka jingiadonlang kiwei kiwei ki dkhot kila pynkup burom ia u ma Sumer ha iingsah jong u ha Panaliar, Jowai. Kane ka society kala ai sngewbha ia u ma Sumer da ki tiar sah kynmaw.

Kane ka jingpynkup burom kalong ba ka society kam lah khlem da kynmaw lem ïa u synñiang u bynhei ba u Ma Sumer, uba long ruh uwei na ki nongseng haka juh ka por kum uwei na ki nongthoh khubor ba rim ka rilum Jaintia ula noh sha ka imlang ka sahlang lyngba kane ka dukan kaba die iaki har rukom ki mar ban iarap ia u nongshong shnong ba duk ba suk ban ioh iaki jain khun, ki kot skul khun bad kiwei kiwei ki tiar ba pyndonkam ha ki iing ki sem haka dor kaba tad.

Kane ka dukan ka don ha Iawmusiang bad haduh mynta ka dang ai ka jingshakri ia u paidbah da kaba die iaki mar ki mata ba har rukom haka dor kaba bit.

U Ma Sumer haba kren ula kyntu iaki nongialam ka Jowai Consumers Co-operative Store ban iatrei shitom shuh shuh ban pynkiew ia kane ka dukan katkum ka jingiaid ka por.

U Ma Riquoma Rq. Laloo uba long u khun jong u Ma Sumer ka jingithuh iaki nongseng kalong ka jingkyrkhu iaki nongialam bad ki dkhot kiba mynta. Ula kitbok kitriwiang shuh shuh ia kane ka society ba kan nang iaid shakhmat bad kan kiew haka kamai kajih jong ka.

U Ma Sumer ha kine ki khyndiat bnai ula shah pynkup burom haka My Home India da ka khusnam “One India Award” na ka bynta ka jingsynñiang jong u haka imlang sahlang kum u nongthoh kot kyrpang ka kot ba ula thoh shaphang “U Kiang Nangbah”.