Pynksan ka Meghalaya HC iaka Dr. Ampareen bad ki ophisar haka mukotduma thungkam nonghikai

Syllad | The Rising MeghalayaSeptember 4, 2025

Hadien 17 snem, ka iingkashari Meghalaya High Court ka la weng bad pynkut noh ia ki jingkynnoh pyrshah ia ka Myntri barim ka Tnad Pule Puthi ka Dr. Ampareen Lyngdoh, u Director barim ka Elementary & Mass Education u J.D. Sangma bad Deputy Director barim ka Ameka I. Lyngdoh ha kaba iadei bad ka jingkynnoh leh bymhok ha ka jingthungkam Assistant Teacher jong ki skul Govt. Lower Primary ha u snem 2008.

Ka Central Bureau of Investigation (CBI) ka la register ia ka case ha u 2018 halor ka ejahar ba la mudui ha u snem 2011, ha kaba la kynnoh ba ki nongshah kynnoh ki la iasuh buit ban pynkylla ia ki score sheet bad iarap ia ki katto katne ki kyrtong. Kane ka jingjied ka dei kaba la pynlong ha ki santylli ki Centre Lane Sub-Division: Shillong, Jowai, Amlarem, Tura bad Dadenggre.

Ka CBI ka la file ia ka chargesheet ha u 2020, bad u Special Judge (CBI) u la kyntait ia ka aplikeshon jong ki nongshah kynnoh ban pyllait ia ki ha u 2022.

“Haba khmih ia ka jingjlan jong ka por ban shong bishar ia baroh ki sakhi ka lah ban shim ia ka por haduh ka jingim ba sah jong ki nongshah kynnoh. Kumta haba pyntreikam ia ka bor hapoh ka kyndon 227 jong ka Code pule lang bad ka kyndon 482, khamtam ka bynta kaba kren bad ka bor jong ka Iingkashari ban khanglad ia ka jingpyndonkam bakla ia ki rukom treikam jong kino kino ki iingkashari lane ban pynthikna ia kaba kut jong ka jingbishar hok, nga weng noh sharud ia ka hukum ba shipor kaba 23 tarik Nailar 2022 ba la pynmih da ka Special (CBI) Case No. 2 of 2020 da u Special Judge (CBI), East Khasi Hills District, Shillong. Ki jingkynnoh pyrshah ia kiba shah kynnoh A1, A2 bad A3 la pyllait noh na ka mukotduma. Ia ki jingbishar baroh kiba la dep ruh la pynkut noh,” ong u Chief Justice I.P. Mukerji ha ka hukum ba pynmih ha ka 4 tarik Nailur 2025.

Kane ka rai jong ka Iingkashari ka dei kaba la pynshong nongrim halor ka jingbymlah jong u nongiasaid ain ka liang pyrshah ban pynshisha ia ka jingleh bymhok pyrshah ia kiba shah kynnoh.

Ka Iingkashari ka khmih ruh ba ki laitylli ki kot kiba pyni ia ki jingkhein ia ki mark jong ki result la soi da ki san ngut ki juh ki briew, kaba pynartatien ba kan don ka jinglehthok.

Ka la ong ba ka slip ba pyni ia ka jingpynkylla ia ki marks kim pat biang satia kum ki sakhi bad ki lah ban don shibun kiei kiei ha lyndet jong ki.

Ka Iingkashari ka la pynpaw ruh ba ym don satia kano kano ka kot ka sla kaba pyni ia ka jingpyndonkam ia ka sia lieh ban pyndam ia ki marks.

“Mynta ka mukotduma ban pynngat kam bymman ka long ba ka A1, A2 bad A3 ki iasuh buit, iasylla bad iatreilang hapdeng jong ki. Ki la pynkylla ia ki score sheet, namar kata ki la bujli ia ki kyrtong kiba pass da ki kyrtong kiba ki mon. Ka original score sheet ka iapher.

La pyndonkam da ka sia lieh ban pyndam ia ki marks bad la thoh bujli da ki mark ba heh ne ba rit ban ai jaka ia ki kyrtong ba ki mon bad ban weng ia ki bym mon.

Nalor kata, la kynnoh ruh ba ka nongshah kynnoh No. 1 (Ampareen Lyngdoh) da ka jingpyndonkam ia ka bor kum ka Myntri ka la phah ia slip kaba bthah ia ki ophisar ban pynkhreh ia ki jingkhein jingdiah jong ki score sheet ba kin pynkylla ia ki marks. Ha kaba nyngkong, ki laitylli ki kot ki pyni ia ki jingkhein marks ha ki kyrdan bapher bapher ba la soi da ki san ngut ki briew. Kaba ar, ka slip ba la wanrah kum ka sakhi kam shym la pyni satia ia kano kano ka jingbthah ban pynkylla ia ki marks. Kam shym la don ruh kano kano ka kot ka sla kaba pyni ia ka jingtah sia lieh,” ong ka Iingkashari.

“Mynta, haba pyntreikam ia ki nongrim ba la buh ha ki rai jong ka Supreme Court, lada ka mukotduma ba nyngkong ba la wanrah da ka liang pyrshah, na ki kot, ki sla, ki rekod bad kiwei kiwei ki sakhi ka long kaba tlot shibun ba ka jingsuba kaba don nongrim kam don satia pyrshah ia ki nongshah kynnoh, ka Iingkashari haba bishar ia kine ki sakhi ka aibor ban pyllait noh ia ki nongshah kynnoh,” ka la ong da kaba bynrap, “Ha kane ka mukotduma na ka liang ki nongiasaid pyrshah kim shym la lah ban pynshisha wat tang ia ki jingkynnoh.”

Ka Iingkashari ka la pynpaw ruh ba kane ka jingthung nonghikai ka dei kaba la leh ha u snem 2008, bad kane ka mukotduma ka la sahteng palat 17 snem, kaba la ktah jur ia ka jingmut jingpyrkhat jong ki nongshah kynnoh. Ka la ban jur ia ka jingdonkam ban khanglad ia ka jingpyndonkam bakla ia ki bor tian bishar bad ban pynthikna ia ka jingpynkut da ka jingbishar kaba hok.

“Ha ka kyndon 482, kane ka Iingkashari ka don ia ka bor ban khanglad ia ka jingpyndonkam bakla ia ki rukom treikam jong kino kino ki iingkashari lane ban pynthikna ia ka jingkut jong ka bishar hok. Ka jingthungkam ka long jong u snem 2008. Haduh mynta la poi 17 snem eiei. Ka FIR kaba nyngkong la mudui ha ka 18 tarik u Naitung 2011. Ym shym la don kaei kaei kaba iaid shaphrang ban pynngat ia kiba shah kynnoh. Tang 28 ngut na ki 181 ngut ki sakhi kiba la shah bishar,” ong ka Iingkashari.

“Kum kane ka jingpynslem kaba la palat liam ban tian bishar ka long ruh pyrshah ïa ka hok tynrai ne ka Fundamental Rights jong ki nongshah kynnoh katkum ki Articles 21, 19 bad 14 ban im ka jingim kaba suk kaba lait na ka jingkhuslai ha ka bor pyrkhat kaba mih na ka jingsahteng jong ka jingbishar,” ka la bynrap.