Pynkieng tin ki paidbah ia u Secretary VEC Pdengshakap, kynnoh tuh iaka pisa 17 lak na ka skim 100 sngi

Syllad | The Rising MeghalayaMay 11, 2021

Ki paidbah kiba la khie bitar kila pynkieng tin ia u Secretary VEC, Pdengshakap, kaba hap ha Amlarem Sub-Division halor ka jingshah kynnoh ba u pyndonkam bakla iaka pisa bylla 100 sngi ne ka skim Mahatma Gandhi National Rural Employment Guarantee Scheme (MGNREGS).

Kane ka jingjia kala jia haka sngi Nyngkong hadien ka jingialang jong ka dorbar shnong ban pan jingshai na u Secretary VEC u Khmihlang Surong uba la bat iaka kam Secretary naduh u snem 2018-19.

U Waheh Shnong ka Pdengshakap, u ma Forward Shylla ula iathuh ba u secretary VEC, u Khmihlang Surong um lah ban ai jingaishai ia u paidbah halor ka jingkynnoh pyndonkam bakla iaka pisa kaba T.17 lak kaba u sei dangshen haka 27-29 tarik u Iaiong naka bynta ba pyntrei iaka skim ha kaban shna iaka pung umdih, ki lynti iaid kjat hapoh shnong Pdengshakap bad kiwei kiwei.

Kane ka pisa T.17 lak kadei ka bai tiar (Material Cost), hynrei kiba bun ki ki nongdie tiar naduh ki cement, ki maw bad shyiap bad kiwei kiwei kila kynnoh ba kim pat ioh bai tiar na u Secretary VEC, ong u Waheh Shnong ma Forward Shylla.

Kine ki nongdie tiar hadien ba la kut ka dorbar namar ba u Secretary VEC um lah ban ai jingshai kila pynshitom ia u da kaba pynkieng da ka tin bad thoh iaki kyntien – ‘Nga dei u nongtuh pisa Job Card Rs.17,53,003. Nga dei u Khmihlang Surong, Pdengshakap Secretary VEC’. Kila pynieng ia une u secretary ha khmat paidbah ban pynjah burom ia u.

U Waheh Shnong ula ong ba halor kane ka jingjia u BDO, Amlarem un wan ban tohkit dalade halor kane ka jingkynnoh bamsap.

Ka dur ba shah pynkieng tin une u secretary VEC kala saphriang sha ki khubor paidbah (social media).