Pynkhreh ka Sorkar Jylla ban shna da ka surok 4-Lane naduh Umiam sha Malidor

Syllad | The Rising MeghalayaMay 11, 2024

Ka Sorkar Jylla ka la pynkhreh ban shna pynheh ia ka surok sha ka 4-Lane naduh na flyover ha Umiam, Ri Bhoi District shaduh ki bynta khappud ka Assam ha Malidor, East Jaintia Hills, bad ka jingjurip ia ki jaka na ka bynta kane ka la jan dep artad.

Ia kane la pynpaw da u Symbud Myntri Rangbah ka Jylla uba khmih ia ka Tnat PWD (Roads) u Bah Prestone Tynsong ha ka 10 tarik mynta u bnai hadien ka jingialang bishar kam ha ka 10 tarik mynta u bnai.

Haba kren sha ki lad pathai khubor, u Bah Tynsong u la ong ba ka jingjngai jong kane ka surok ha ka National Highway -6 ka long kumba 160 haduh 170 kilometre.

“Ngi la pynlong ia ka jingialang iamir jingmut bad bishar bniah hadien ba la dep sorjamin ia kane ka surok ha ryngkat ki heh ka tnat ba dei khmih kynthup ia ki heh na ka NHIDCL kaba pyntrei ia kane ka projek,” ong u Bah Prestone. Nalor kata u la bthah ruh ia ki Deputy Commissioner ka East Jaintia Hills bad West Jaintia Hills ba kin thaw ia ka Committee na ka bynta ka jingpyntreikam ia kane ka projek kaba kongsan bha.

Kane ka Committee kan kynthup ruh ia ki dkhot na baroh ki tnat ba dei khmih bad ki nongmihkhmat na ka liang ka NHIDCL.

“Ka East Khasi HIlls bad ka Ri Bhoi District ki la dep ban thaw ia ka Committee bad mynta nga la bthah ia ki DC ka West Jaintia bad ka East Jaintia Hills ba kin thaw ia kajuh ka Committee na ka bynta kane ka project kaba kongsan bha na ka bynta ka jylla Meghalaya,” u la ong.

U la ong ruh ba kane ka project ka dei kaba heh bha namar kan poi shaduh sha Silchar, bad ka jinglut jingsep kan kot hapdeng ka 20 lane 22 hajar klur. U la bynrap ruh ba kane ka projek kan don haduh san bynta (five packages) ha Meghalaya bad ka jingsorjamin ia ka jaka kala jan poi artad sha kaba kut.

 “Ka jingsorjamin ia ka bynta ba I bad II bad ba III ka la jan dep artad,” u l ong da kaba bynrap ruh ba ka jingtywa ka long ruh ban shna kumba laitylli ki tunnel ha ki bynta jong kane ka surok.

Ha kawei pat ka bynta u Bah Prestone u la ong ha kaba iadei bad ka kam thied jaka shen kan sa sdang noh. Kane ka jingialang mynta ka sngi ka long ruh ban pynthikna halor ki mat kiba iadei bad ki jingpynbeit ia ki kam jaka pura da ki district committee.

“Dei na kata ka daw ba Nga la bthah ia ki DC jong ka East bad ka West Jaintia Hills ba kin sdang ban thaw ia ka comittee ka ban kynthup ia baroh, kata la kalong ka Tnat Revenue, PWD (Rds), Forest, Agriculture bad kiwei pat ki Tnat kiba don bynta ha ki kyrdan district, kata ha kaba kin hap ban long ki dkhot hapoh jong kata ka committee bad ba kin pynbeit ia kane ka mat kawei hadien kawei,” ong shuh shuh u Symbud Myntri Rangbah.