Pynkhreh ka Sorkar Jylla ban pynim biang ia ka MoU ban pyntrei ia ka Kynshi Hydro Project

Syllad | The Rising MeghalayaJuly 4, 2025

Ka Sorkar Jylla ka la pynkhreh ban pynim biang ia ka Memorandum of Understanding (MoU) ba la iasoi bad ka M/s Athena Private Limited na ka bynta ban pyntrei ia ka Kynshi Hydro Power Project stage-I.

U Myntri ka Tnad Bording u AT Mondal haka 3 tarik Naitung, ula pyntip ba ia ka jingtyrwa ban pynim biang ia ka jingiasoi MoU yn sa wanrah shen ha ka jingialang jong ka Kynhun Myntri.

Ha kaba nyngkong ia kane ka project la ai sha ka Athena Pvt Ltd na ka bynta ban shu den ia ka wah (Run-of-the-River), Hynrei, ka kompeni hadien ka la tyrwa ia ka hybrid model ban pynrung lang ia ka Pump Storage Project (PSP) technology. Namar ka jingbym don ka kyndon PSP ha ka MoU kaba la iasoi bad ha ka Power Policy ka Jylla, kumta na ka liang ka Kynhun Myntri ka la rai ban pyndam noh ia ka MoU kaba rim.

Lyngba ka policy kaba thymmai ba la pynrung ia ka PSP, ka M/S Athena Pvt Ltd ka la jied ban leit biang sha ka jingtyrwa ba nyngkong ban shu den ia ka wah khlem da leh ia ka PSP, da kaba kdew halor ka jinglah ban leh da ki buit thymmai.

“Da ka jingwan ka teknologi kaba thymmai, ki (Athena) ki la ong ba ka RoR ruh ka biang ban pyntrei. Kumta ki kwah ban leit da kajuh ka jingtyrwa kaba rim khlem ka PSP. Namar ba ngi la pynduh ia ka MoU barim ha ka kynhu Myntri, kumta ngi hap ban rah biang ha ka jingialang jong ka kynhun Myntri ban pynim ia ka MoU kaba rim. Kane kadei ka jinglong jingman kaba mynta,” ong u Mondal haba kren sha ki lad pathai khubor.

U Mondal u la pynpaw ruh ba ka sorkar Jylla kan ioh ei 12% ka bording hadien ba la pyntreikam ia kane ka project, bad 1% yn mang na ka bynta ka roi ka par jong ki shnong kiba don hapoh ka thain.

Na ka liang u Myntri u la iakynduh ruh ia ka kynhun jong ka Joint Committee of Local People on Kynshi Hydro Power Project (JCLPKHPP), kiba pynpaw ia ka jingangnud ban pyntrei noh ia kane ka project.

U Myntri u la kular ruh ia kane ka kynhun ba un sa lum ia ka jingialang khnang ban wanrah ia ka jingiatreilang hapdeng ka Sorkar, ka Kompeni bad ki kynhun bapher bapher jong ka thain.

“Nga don ka jingkyrmen kaba skhem namar ngi dang donkam shuh shuh ia ka jingpynmih bording.Khlem ka jingpynmih bording ngin ym lah ban kyntiew ia ka kyrdan bording ka jong ngi. Kane ka kynhun ka la wan iakynduh ia nga bad nga sngewnguh shibun. Nga la iakynduh bad ki mynta la slem bha.Mynta ki la wan ha ryngkat ki kyndon jingdawa bad kaei kaei kaba la iakren ka la long kaba sngewtynnad bad kam don kano kano ka jingeh,” bynrap u Myntri.