Pynkhreh ka MFA ban pynlong National Futsal League

Syllad | The Rising MeghalayaSeptember 8, 2021

Ka Meghalaya Football Association (MFA), ka pyntip ba ka jingpynkhreh na ka liang ka jong ka ban pynlong ia ka National Futsal League ka la sdang ba kan jam shakhmat.

Ia kane ka pynpaw da ki nongkit kam jong ka MFA hapoh ka jingialam u bah S.S Rapthap kum u Secretary, haba iakren bad kane ka lad pathai khubor mynta ka sngi.

Kumban shu pynkynmaw ba na ka liang ka All India Football Federation, ka la wan shakhmat ba kan tyrwa sha ka MFA, la ka kloi ne em ban pdiang ha kaban pynlong ia kane ka lympung ialehkai Phutbol, da ka jingwan iakynduh ka jong u CEO ka I. League u Sunando Dhar ia ki nongkitkam ka MFA bad ruh ban ia kynduh markhmat ia u Myntri ba dei khmih ia ka tnat Sports u bah Bantdeidor Lyngdoh ha u bnai u ba la dep.

Na ka liang u nongai ktien jong ka MFA u  Arki Nongrum, u iathuh ba kan sa don ka jingpynlong ia ka National Futsal League hangne hapoh ka jylla, ha kaba ki kynhun ban wan iashim bynta kin kynthup naduh ki klob ba iakhun ha ka lympung ialehkai ka Indian Super League, I. League, bud pat sa ki jylla ne ki kynhun kiba dei na kiwei pat ki synjuk ialehkai Phutbol jong ki jylla kiba don hapoh ka ri, tangba kin dei pat ban lah ban pyndep ia la ki lympung ialehkai state futsal league.

Ia kane ka lympung ialehkai, la rai ban pynlong ia ka ha madan ialehkai Phutbol jong ka Assam Rifles, ba don ha Laitkor.

Nalor katta u bah Arki u iathuh ba wat na ka liang ka MFA ka la shim ia ka rai ba kan da pynlong shwa ia ka state futsal championship ban iashim bynta da 16 tylli ki team ban sa phiah ia ki sha ki saw tylli ki group bad ia ki jingpynkhreh jong kane mynta ki dang jam shakhmat bad khmih lynti ba ha kine ki khyndiat sngi kiban sa wan yn sa lah ban nang tip kham bniah kiei kita ki kynhun ne ki team ban iashim bynta ha kane ka lympung ban pynlong sha  NEHU.

U Arki u la iathuh ruh ba ia kane ka rai ban pynlong ia ka National Futsal League ka dei kaba la wan hadien ba ka MFA ka la dep ba kan buh ia kane ka jingtyrwa ka jong ka sha ka AIFF, hadien ba la dep ban plan ruh syndon naka bynta ban sain dur janai ia ka jingialehkai jong ka futsal hangne hapoh ka jylla.

Haba jubab halor ka jingkylli kaei ka kular ba ka sokar jylla ka la ai haba iadei bad ka jingpynlong ia kane ka lympung, na ka liang u Secretary u bah SS Rapthap bad Arki, ki pynpaw ba ka sorkar jylla, ka la ai dak ia ka MFA ba kan iaid beit shakhmat ha kaban pynlong ia kane ka ka National Futsal League hangne hapoh ka jylla.