Pynkhreh ka Meghalaya-Assam ban thung mawpud noh ha ki hynriew jaka ba la iasoi MoU ha u Nohprah

Syllad | The Rising MeghalayaOctober 1, 2023

Ka Sorkar Assam bad Meghalaya ha ka jingialang kaba la long ha ka sngi Saitjain ba la lah ha Khanapara ki la shim ia ka rai kaba khatduh ha kaba iadei bad ka jingpynkhreh ban thung mawpud bad ka jingbynta noh ia u pud u sam hapdeng kine ki ar jylla ha kaba ki la pynbna ruh ba ki lah ban pyndep noh ia kane ka kam hapoh ka 31 tarik Nohprah 2023, kata na ka bynta baroh ki 6 tylli ki jaka ba la dep ban iakren ia pynbeit ha ka kylla kaba nyngkong.

Nalor kata na ka liang u Myntri Rangbah ka Meghalaya u Conrad K Sangma bad u Himanta Biswa Sarma ka Assam ki la shim ruh ia ka rai ban pynlong ka jingleit jurip ia ka thain Khanduli-Psiar ha ka taiew kaba kut jong une u bnai Risaw.

Kine ki ar jylla ki la pynpaw ruh ia ka jingangnud ban pynkut noh kloi ia ka kam iakajia pud ha ki lai na ki hynriew tylli ki jaka khappud kiba don hapdeng ka jingiapher jingmut, kata kaba kynthup ia ka Langpih, Borduar bad Deshdoomreah.

Na ka liang u CM ka Assam u la ong ba u sngewkmen ban pyntip sha ki paidbah ka Assam bad Meghalaya ba hadien ki jingiakren ba jlan mynta ki la pynkhreh ban shim ia ka rai kaba khatduh eh halor ka kam thung mawpud bad halor u pud u sam ha ki hynriew tylli ki jaka kiba don hapdeng ka jingiakajia ia kiba la dep ban iasoi ia ka MoU ha ka jingiadonlang u Myntri kam Pohiing jong  ka Ri.

Nalor kata u pyntip ruh ba na ka liang ka Survey of India ka la dep ha kaba iadei bad ka jingleh ia ka survey ha Hahim sector bad mynta yn pynkhreh ban thung noh ia ki mawpud ia kaba la pdiang sngewbha da ki sorkar jong kine ki ar jylla.

“Ngi la kyntu ia ki heh jong ka tnat Survey of India ba kin pynkloi ban pyndep noh ia ka survey na ka bynta ki santylli kiwei pat ki jaka shwa ka 31 tarik u Nohprah u ban wan, bad ba  jingleh ia ka survey na ka bynta ki laitylli ki jaka ka la jan dep artad.

Shuh shuh u la ong kumba ka long mynta tang kawei ki la iakynduh jingeh tang ha kaba iadei bad kawei ka jaka ia kaba la tip kum ka Mallang Salbari ba la tip ruh kum ka Tarabari. Halor kane u la ong ba ki la kyntu ia sha ka liang ka Assam ba kan kham jynsur ha kaba iadei bad ka jingpruid dak ia ki jaka khappud khnang ba ki nongshong shnong kiba dei ki trai shnong kin ym ngat ha kino kino ki jingeh bad khnang ban lah ban ia pynbeit da ka lynti kaba suk ba sain.