Pynkhreh ka MCA ia ka kynhun ki thei ialehkai sha ka BCCI U-19 Women’s Cricket 

Syllad | The Rising MeghalayaAugust 27, 2025

Ka Meghalaya Cricket Association ka la pyllait paidbah biang sa shisien ia ka thup kyrteng jong ka kynhun U-19 women’s cricket, kaba la wan lyngba ka kaiphod kaba la aiti sha ka da ka Junior Women’s Selection Committee, kaba la pynbna ia ki kyrteng ki 25 ngut ki thei ialehkai, kiban khreh ban mihkhmat ia ka jylla, ha ka samoi ialehkai 2025-26 ban sa wan jong ka BCCI.

Ha kane ka kynti, ka jingjied ia ka kynhun ki thei ialehkai ka dei da kaba pynshong nongrim ruh ia ka jinglah ban ialehkai bha ka jong ki ha ka samoi ialehkai 2024-25 bad ha ka juh ka por ha ka jingdon bynta ka jong ki sha ka jingpyrshang (trial) ba la pynlong da ka MCA.

Kumta haba iadei bad kane, ka MCA kan pynkhreh ia ka jingpyrshang kaba ar ka jong ka, kaban long naduh ka 15-19 tarik u bnai Nailur u ban wan ha Nongkhrah, Ri-Bhoi District bad hadien kane yn sa bynrap bad ka jingpynkhreh (preparatory camp).

Ha kane ka kynti, kane ka kynhun U-19 kin khreh ban mih madan ban ia aireng ha ka lympung iakhun jong ka BCCI’s U-19 Women’s T20 Trophy kaban long ha ka 26 tarik u bnai Risaw bad ka U-19 Women’s One Day Trophy kaban long ha u Nohprah.

Ki nongialehkai kiba shah jied: Monica Singh, Cheanchi Kambesa Sangma, Chigesanora Marak, Jayshree Singh, Marme M Sangma, Adalyne F Lyngkhoi, Namesha A Marak, Beneros D Shira, Adelakmen Lawai, Joanna Pyngrope, Banchila Marak, Yoolang Suting, Eliza Lyngdoh, Dawanshisha Warlarpih, Rosabel Lyngkhoi, Isha Ray, Jennifer Fancon, Ronjoli Basumatary, Rafinia Ryntathiang, Steffinie Sohshang, Fennysha Nongrum, Shreya Marak, Julitha Marak, Dejianna M Sangma, Mendy Adrena Mawlong.