Pynkhreh ka BJP ia ka Election 2028 da kaba pynthymmai nongkitkam; kyntait mih na ka Sorkar MDA

Syllad | The Rising MeghalayaJune 15, 2025

Kum shibynta ban pynkhreh na ka bynta ka Election 2028 sha ka iingdorbar thawain ka Jylla, ka BJP Meghalaya ka la ioh ban jied ia ki nongkitkam bathymmai jong ka na ka bynta ka samoi treikam 2025-2028, da kaba kyntait ruh halor ka jinglah ban weng noh ialade na ka sorkar MDA ba la ialam da ka National People’s Party (NPP).

“Kumba ka party ka dang pynkhreh ialade na ka bynta ka election ka ban wan ha ka jylla, na ka liang u National President u JP Nadda u la ai ka jingmynjur ia ka kynhun kaba thymmai na ka jylla ka ban khmih halor ka jingpynkhreh ia ka election 2028,” ong u President ka BJP Meghalaya u Rikman G Momin haba kren ha ka jingialang bad ki lad pathai khubor haka sngi Saitjain.

“Hapoh ka seng teng teng ngi hap ban peit kumno ban pyniaid ia ka party. Kumta ka party, nga dei u nongialam bad nga hap ban peit kumno ka party ka iaid. Nga hap ban pynkylla na ka bynta ki katto katne ki bym lah ban trei na ka bynta ka party,” u la bynrap.

La ka party ka don ne em ia ka jingpyrkhat ban mih noh na ka sorkar ba la ialam da ka NPP ha ka jylla, u Momin u la ong, “Kane ka shong ha ki nongialam na Delhi namar ba na NPP ka iatreilang bad ka BJP lyngba ka NDA, kumta ki dang bteng ban iatreilang.”

U la ong kano kano ka rai halor kane ka phang ka jubab kan dei beit na ki nongialam napoh Delhi.

Katkum ka jingong ka jong u, ka jingiatreilang bad ka NPP kan ym ktah satia ia ka BJP ha Meghalaya.

U Momin u la iaroh ruh ia ka jingtreikam jong ka sorkar MDA-2 bad ong, “Ka leh ia kaba bha.”

Nalor kata u la kynthoh kyrpang ruh da kaba ong, “U Myntri Rangbah ka jylla u la trei shitom shisha bad kum shibynta jong ka sorkar, ngi kyrshan ruh ia ki ha kano kano kaba ngi lah ban leh. Ka sorkar MDA-2 ka la lah ban treikam bha bad phi la iohi ia kiba bun ki kam pynroi kiba la kiew sted.”

Haba kylli, u Momin u la ong ba ki don ki nongialeh pyrshah hadien ba ki nongialam napoh Delhi kim shym la ai tiket ia ki ban iakhun ha ka election Lok Sabha kaba la dep.

 “Ha katei ka por ki la kynnoh ia u president ka jylla. Lehse ha katei ka por ki la don ki nongialeh pyrshah hynrei mynta ngi la biang pura. Ngi bud ryntih ia baroh ki prokram napoh central. Ngi don ia ka seng kaba biang nadong shadong,” u la bynrap.

U Momin u la pyntip ruh ba ki don shibun kynthup ia ki nongmihkhmat barim kiba la pynpaw ia ka jingdon mon ban wan pyniasoh sha ka party. “Ngi pdiang sngewbha ia baroh ba kin wan pyniasoh sha ka party, ban trei na ka bynta ka party bad ka jylla,” u la ong.

Kine ki nongkitkam bathymmai ka BJP Meghalaya ki kynthup ia ki hynriew ngut ki Vice President, kata u  Khrawboklang Basaiawmoit, Dr Bernadette Lyngdoh bad u Er Bipen Pradhan (Shillong City), Bernard N Marak bad Anil Hajong (Tura city), Lakhon Biam (West Jaintia Hills), ki arngut ki State General Secretary ka Jylla ki kynthup ia u Bah Wankibok Pohshna bad u  Amitava Saha, hynriew ngut ki State Secretary kiba kynthup ia ka Ellicia A Sangma, Belbora Wankhar, Daniella L Nonglait, Sukhi Pariat, Commanderful Sana bad Wilber Danngo Marak,  State Treasurer Sarwan Jhunjhunwala, State Joint Treasurer – Ashok Singhania, Media Convener – Sabyasachi Ghose, Chief Spokersperson – Mariahom Kharkrang, IT convener – Sarad Bawri, Social Media Convener – Fredee Aaron Kahit, Office secretary – Dipika Dey bad u State cells convener  Deeya Singh Rathore.