Pynkhie im biang ka UDP-HSPDP ia ka  RDA ban sei kyrtong mon lang ha ka ilekshon Lok Sabha election

Syllad | The Rising MeghalayaNovember 8, 2023

Ka Seng United Democratic Party (UDP) bad ka Hill State People Democratic Party (HSPDP) haka 7 tarik Naiwieng ki la pynkhie im biang ia ka Regional Democratic Alliance (RDA) ban pynkhreh ryngkat lang na ka bynta ka election Lok Sabha ka ban long ha u snem u ban wan na Shillong Parliamentary Seat.

Ka jingialang ka RDA kaba la long haka 7 tarik Naiwieng, ka la thung ia u heh ka UDP u Bah Metbah Lyngdoh kum u Chairman bad u President ka HSPDP u Bah KP Pangniang kum u Secretary ka RDA.Katba u nongialam ba la rim ka HSPDP uba dei ruh u MDC ka Mawkynrew u Bah Martle Mukhim u la shah jied kum u Co-Chairman bad u President ka UDP ka East Khasi Hills Bah Titosstarwell Chyne kum u Asst Secretary.

Haba kren sha ki lad pathai khubor u Bah Metbah Lyngdoh u la ong, “Ngi sngewbha ban pyntip ba baroh ki ar party riewlum ki la poi sha ka jingmynjur halor ka nongrim ban pynthikna ba ka RDA ka dan long kawei abd ba kan dang iai bteng ban trei na ka bynta ka bha ka mia jong ka party.” 

“Ngi la shim ruh ia ka rai ban don sa 11 ngut ki dkhot ia kiba yn sa jied da ki ar party,” u la ong. Nalor kata u Bah Metbah u la ong ruh ba ha ki snem ba la dep kine ki party riewlum ki la ryngkat lang bad kane ka jingpynkhie im biang ia ka RDA mynta ka sngi ka dei kaba la shim rai ha ka jingialang kaba la long ha ka 30 tarik u bnai Jymmang ba ladep, kata hadien ka ilekshon MLA 2023.

Nalor kata une u nongialam ka UDP u la ong ruh ba ia kiwei pat ki kam kaba kynthup halor ka jingjied ia u kyrtong na ka bynta ka ilekshon Lok Sabha kin sa iakren ha ka jingialang ka ban wan jong ka RDA ia kaba yn sa pynlong shen.U la ong ruh ba ha kane ka jingialang ka ban wan kin sa iamir jingmut bad shim rai ruh ha kaba iadei bad ka ilekshon MDC ka ban wan jong ka KHADC bad JHADC.

Kumjuh na ka liang u Bah Pangniang u pyntip ba ha kane ka jingialang la rai ruh ba hynriew ngut ki dkhot kin dei na ka UDP bad 5 ngut na ka HSPDP khnang ba ka jingdon jong ki nongkitkam hapoh ka RDA kan long kaba dap pura. Nalor kata u la ong ruh ba kine ki ar party ki la iamir jingmut lang ruh halor ka jingdonkam na ka bynta ban ia pyrkaht sani bha halor kumno ban pyniaid shakhmat ha kaba iadei bad ka jingpynkhreh ia ka ilekshon MP hapoh ka shatri jong ka RDA.

Shuh shuh u la ong ba baroh ki ar party kin wad ia u kyrtong na ka bynta ka Shillong seat bad tyrwa hakhmat ka RDA ka ban sa shim ia ka rai kaba khatduh halor kane ka phang.