Pynjulor ka lyer bun tylli ki ïing ha WJH

Syllad | The Rising MeghalayaApril 29, 2021

Ka lyer bajur bad khlain bor kaba la wan ryngkat bad u slap haka shnong Ïooksi Kyanmynsar, Thlongmoo kiba hap ha Laskein Block, West Jaintia Hills District kala pynjulor iaki hynriew tylli ki ïing bad rat iaki tnum iing.

Ka jingwan lyngshop jong ka lyer bad u slap ka la jia haka 27 tarik haka por 11.30 mynstep, ïathuh u Waheh Shnong ka Ïooksi Kyanmynsar, Thlongmoo u Bah Leonard Rabon.

Ula ïathuh ba ka jingwan jong lyer kaba la neh shikynta ryngkat ka jinghap jong u slap ba neh saw kynta ka la wanrah ka jingjulor bad jingduh bakhraw ïaki Hynriew tylli ki longïing ha kane ka Shnong kynthup ki jingthung jingtep ba la rep da ki nongrep khamtam u riewhadem.

Kine ki Hynriew tylli ki longïing kiba shah pynjulor haki bor mariang ki long ka ïing jong ka Daplin Pasleiñ, Hunlang Latam, Dapsan Ïakai, Phulwin Pasleiñ, Iknas Manar bad Willson Tangliang.

U Bah Rabon ula ïathuh ba na ka liang u BDO jong ka Laskeiñ ruh ula phah ïaki briew jong u ban jurip ïa kane ka jinglyngshop ki bor mariang.

Ula ïathuh ruh ba na ka liang ka Shnong hynnin ka sngi ka la mih paidbah ban maramot ïa kitei ki ïing bad synniang ruh da ki Tin lai ban ryngkat ka pisa.

U Waheh Shnong ula kyrpad ïaki bor District ban pynïoh ki lad jingïarap katba lah kloi khnang ba kine ki lanot kin ïoh jaka riehtngen.