Pynjulor ka ‘eriong ia ki iing ki sem bad ki mar rep ha Umdap Dumu bad Umdap Rangi, Ri Bhoi

Syllad | The Rising MeghalayaJuly 16, 2025

Ki nongshong shnong jong ka shnong Umdap Dumu bad Umdap Rangi kiba hap hapoh Umling C&RD Block, Ri Bhoi District ki la mad ia ka jingduh nong kaba khraw namar ka jingwan syllad kynsan jong ka ‘eriong kaba jur ha ka jan miet jong ka 14 tarik Natiung kaba la pynjulor ia kiba bun tylli ki iing ki sem bad ki jaka rep.

Kane ka jingjia ka la jia ha ka por 2 baje nohphai sngi hadien ba ka ‘eriong kaba jur ka la wan ban sar kynsan ia kane ka thain da kaba pynjulor ia ki phew tylli ki iing ki sem bad ki mar rep kaba la wanrah ka jingduh nong kaba khraw ia ki nongshong shnong.

Haba kren halor kane ka jingshah pynjulor ki Rangbah Shnong jong ka shnong Umdap Rangi bad Umdap Dumu, kata u Bah Alexander Maring bad u Bah Julius Maring ki la ong ba ka jingwan syllad kynsan jong kane ka ‘eriong ka la ktah jur ia ki nongshong shnong bad pynjulor ia palat 20 tylli ki iing ki sem kumjuh ia ki mar rep kiba kynthup ia u tympew, ka kait bad kiwei pat ki mar rep.

Namar kane ka jingjia shah pynjulor, na ka liang ki nongialam shnong ki la kyrpad ia ka Sorkar ba kan phah mardor ia ki ophisar ba kin wan jurip ia ki jingjulor bad ban pynkhreh na ka bynta ki lad jingiarap sha kito ki longiing kiba la shah ktah.