Pynjlan biang ia ka jingkhang iaid kali na jingkieng Umshyrpi haduh ka 18 tarik

Syllad | The Rising MeghalayaJune 17, 2025

U Superintendent of Police ka East Khasi Hills, u Bah Vivek Syiem haka sngi Nyngkong u pyntip ba ia ka jingkhang iaid kali lyngba ka jingkieng Umshyrpi namar ka jingpyntrei kaba dang iaid shakhmat la pynjlan biang sa na ka bynta lai sngi, kata naduh ka miet jong ka 16 haduh ka 18 tarik Jylliew naduh ka por 10 baje mynmiet haduh 5 baje mynstep jong ka sngi kaba bud.

Ka jingpynbeit na ka bynta ka leit ka wan jong ki kali ha kine ki kynta ban khang iaid kali ka long kito kiba wan na ka thain Upper Shillong sha jingkieng Umshyrpi – MES point kin iaid noh na 5th Mile, Upper Shillong sha Pomlakrai – Laitkor – Madanrting – Laitumkhrah bad kumta ter ter.

Ki kali kiba wan na ka thain Lumdiengjri / Old Cherra sha Upper Shillong lyngba ka Jingkieng Umshyrpi kin hap ban iaid noh na Laitumkhrah – Madanrting – Laitkor – Pomlakrai – 5th Mile, Upper Shillong bad kumta ter ter.

Hynrei na ka bynta ki kali kiba don ha ki kam kyrkieh ki bym lah ban kiar yn shah ba kin iaid lyngba kane ka jingkieng, bynrap u SP.