Pynjari u DM ka West Jaintia Hills da ki kyndon Section 144 CrPC ban iada ia ka wah Myntdu

Syllad | The Rising MeghalayaAugust 10, 2023

U District Magistrate ka West Jaintia Hills District, u Bah  B.S Sohliya, IAS ha ka 7 tarik mynta u bnai u la pynjari da ka kyndon Section 144 CrPC kaba maham  tyngeh ha kaba iadei bad ka jingpom dieng, ka jingtih shyiap, ka jingkhlong maw, sait jain, kali bad bret jakhlia ha ki bynta jong ka wah Myntdu bad ki jaka ba markhap jong ka khnang ban iada ia kane ka wah na ka jingpynjakhlia.

Kane ka jingmaham ka long ruh hadien ka jingpynmih hukum da u Chief Secretary ka sorkar Meghalaya katkum ka shithi No. FOR/CCI2/2017/915, Dt. 26/3/2022 bad ruh ka jingpyntreikam ia ka hukum ne Order jong ka NGT.

Ka jingshim ia kine ki sienjam ba pyrkhing ka la wan long ruh hadien ba ka jinglong jingman jong ka um hapoh kane ka wah Myntdu ka la shah ktah jur katba nang mih ki sngi namar ka jingdon jong kiba tih shyiap tih maw beain, kiba bret jakhlia kumjuh kiba saitjain bad sait kali harud jong kane ka wah.

Namar ka jingdawa jong ka kam kumta ruh kane  ka hukum kan treikam mardor tad haduh ban da pynbna da kumwei pat.