Pynjari ka DC da ka korphiw miet ha khappud Bangladesh ban khanglad ia ki kam phrung tuh

Syllad | The Rising MeghalayaAugust 22, 2025

Ban khanglad ia ki kam phrung tuh sha u pud u sam ka jylla, ki bor District ka East Khasi HIlls ki la pynjari da ka korphiw miet ha shilynter ki jaka khappud bad ka Bangladesh ka ban treikam na ka bynta kine ki ar bnai ban wan.

Kane ka korphiw kan sdang treikam naduh ka por 8 baje mynmiet haduh 6 baje mynstep hapoh u radius ba 1 kimomitar na u zero-line jong ki jaka khappud hapdeng hapdeng ka India-Bangladesh.

Ia kane ka hukum la pynmih da ka District Magistrate Kong RM Kurbah ha ka 21 tarik Nailar kaba khang pyrshah ia ka leit ka wan jong ki briew ha ki jaka khappud da ka jingthmu ban jam lyngba ia u pud u sam bad ka Bangladesh ne ban wan rung tuh sha u pud u sam ka India.

La khang pyrshah ban pynlong ia kino kino ki jingiaid paidbah ba khlem da ioh jingbit, ka jingialum briew kaba palat ia ka 5 ngut bad ka jingrah ia ki tiar pynmynsaw ne kiwei pat ki tiar ba lah ban pyndonkam kum ki tiar pynmynsaw kynthup ia ki dieng lane nar rod bad ki maw ha ki bynta khappud ka India-Bangladesh nalor ki kam beain kynthup ia ki kam khaii tuh masi, ki mar ki mata, kwai tympew, kha tyrkhong, biri sikret bad kiwei kiwei.

Kane ka hukum ka long kaba donkam haba khmih ia ka jinglong jingman ba mynta ha Bangladesh ha kaba ka lah ban don ka jingpyrshang wan rungtuh da ki riew bymman, ki dkhot jong ki seng lehnoh, ki nongkhaii tuh bad kiwei kiwei ki kam beain lyngba ki jaka khappud ka India-Bangladesh, ong ka kong Kurbah.