Pyniar ka North Liberty Higher Secondary School iaka shlem sam jingnang jingstad na Jowai sha Tongkiad Iooksi

Syllad | The Rising MeghalayaDecember 16, 2022

Ka North Liberty Higher Secondary School, Jowai kala pyniar iaka shlem treikam ban sam jingnang jingstad sha nongkyndong ban iarap iaki khynnah ban pynioh iaka jingnang jingstad ha la shnong, khamtam kiba wan na ki longiing kiba duna haka ioh ka kot, hynrei kiba don iaki sap kaba kyrpang.

Kane ka jialong hadien ba u Ma Richard B Uriah Principal ka North Liberty Higher Secondary School ula shimti ban pyniaid iaka skul David and Lois Rees Memorial School, Tongkiad Iooksi haka 15 tarik u bnai Nohprah 2022.

Ka Tongkiad Iooksi ka dei ka shnong kaba jngai kumba 50 KM na Jowai ka sorbah jong ka West Jaintia Hills District.

Kane ka skul ka dei kaba la sdang da ka kmie ki kpa u Ma Richard B Uriah ka Mem Margruerite S C Uriah bad u Bah S Bnasan Uriah kiba sdang iaka lyngkha treikam haka kam mission ban saphriang iaka gospel kumjuh kila sdang ia ka skul David and Lois Rees Memorial School ban pynkylla iaka rukom pyrkhat bad ban tbeh jingshai iaka shnong ka thaw da ka jingnang jingstad.

Kum ka jingsdang ban shimti ia kane ka skul u Ma Richard ula khot pynrung klas ne admission naduh Nursery haduh klas 8 naka bynta u snem 2023-24 bad ha kajuh ka por u khot pyrshang ne trial ruh iaki khynnah skul kiba don ka sap ialehkai football.

Ha kane ka kynti haka jingpyrshang ki don haduh 14 ngut ki khynnah kiba la shah jied hapoh ka sport quota bad kine ki 14 ngut ki khynnah kim donkam ban siew iaka bai skul ban leit skul ha David and Lois Rees Memorial School.

Ha kane ka juh ka sngi u MLA ka Mowkaiaw Ma Nujorki Sungoh ula plie paidbah ruh iaka computer lab jong kane ka skul kaba ula synniang haduh T.5 lak sha kane ka skul ban sdang iaka jinghikai computer iaki khynnah naduh dang rit.

Ha kane ka jigialang plie iaka computer lab, nalor u MLA ka Mowkaiaw ma Nujorki Sungoh uba long kum u kongsan la iadonlang ruh u Winning Garland Sungoh MDC, Dolloi ka Elaka Raliang ma Chawas Lyngdoh ki nonghikai, u coach ialehkai football Milan Lynrah nalor ki kmie ki kpa bad ki khynnah skul jong kane ka skul.

La pynphuh pynphieng ia kane ka sngi da ka jingrwai jingshad ki khynnah skul jong ka David and Lois Rees Memorial School, ka North Liberty HSS bad ki nonghikai.

La sam ruh iaka result jong kane ka skul bad sam iaka khunsam bat bit tam ki khynnah ha skul. Kham hadine la pynlong iaka jinglehkmen Advance Christmas kaba la shimbynta d aki khynnah skul jong kine ki artylli ki skul, ki nonghikai bad ki nongshong shnong kiba la shah khot sngewbha.